Аддзел навін 26 верасня 2024, 16:11

60% мэйнтэйнераў адкрытага софту не атрымліваюць грошай за сваю працу

У сярэдзіне года кампанія Tidelift правяла апытанне сярод прыкладна 440 айцішнікаў, якія займаюцца падтрымкай оўпэнсорсных праектаў, аб узнагародзе, дакументацыі, бяспецы і шэрагу іншых момантаў, звязаных з гэтай дзейнасцю.

4 каментарыя

У сярэдзіне года кампанія Tidelift правяла апытанне сярод прыкладна 440 айцішнікаў, якія займаюцца падтрымкай оўпэнсорсных праектаў, аб узнагародзе, дакументацыі, бяспецы і шэрагу іншых момантаў, звязаных з гэтай дзейнасцю.

60% мэйнтэйнераў — як і год таму — адказалі, што займаюцца падтрымкай у оўпэнсорсе ў якасці хобі і не атрымліваюць грошай. У тым ліку 16% сказалі, што не хацелі б атрымліваць за яго грошы (летась такіх было 14%), а 44% — хацелі б.

Доля прафесійных мэйнтэйнераў, якім падтрымка оўпэнсорсу прыносіць увесь або асноўны даход, склала 12% (было 13%), а паўпрафесіяналаў, якія атрымліваюць нейкія грошы — 24% (было 23%).

Аўтары апытання падкрэсліваюць, што за год доля мэйнтэйнераў, чые намаганні аплачваюцца, не змянілася, хоць улады і арганізацыі пастаянна кажуць пра важнасць бяспекі праграмнага забеспячэння. Пры гэтым адзначаецца, што чым больш грошай плацяць мэйнтэйнерам, тым больш часу яны ўкладаюць у свае праекты і тым больш уносяць якасных паляпшэнняў.

Большасць (81%) хацела б атрымліваць нейкі прадказальны штомесячны даход, яшчэ 7% — аднаразовую выплату, а астатнія не вызначыліся.

Акрамя аплаты працы, мэйнтэйнеры паскардзіліся на стрэс, звязаны з суправаджэннем адкрытага софту, завышаныя чаканні карыстальнікаў і адчуванне, што іх працу не цэняць.

Поўную версію даклада з гэтымі і іншымі высновамі аўтараў можна паглядзець па спасылцы.