Adobe паабяцала змяніць карыстальніцкае пагадненне пасля скандалу праз фармулёўкі

Карыстальнікі заяўлялі, што цяпер Adobe зможа афіцыйна праглядаць кантэнт, які стварылі аўтары з дапамогай праграм кампаніі і захоўваюць у воблаку. Людзі палічылі, што Adobe унесла змены ў дакумент для выкарыстання кантэнту ў навучанні генератыўных нейрасетак. Кампанію пачалі вінаваціць у крадзяжы работ з мэтай перапродажу.

Кіраўніцтва выступіла з абвяржэннем. «Ваш кантэнт належыць вам і ніколі не будзе выкарыстоўвацца для навучання якіх-небудзь інструментаў генератыўнага штучнага інтэлекту», — гаворыцца ў заяве дырэктара па прадуктах Adobe Скота Бельскі і віцэ-прэзідэнта ў прававых пытаннях Даны Раа.

Кампанія паабяцала перагледзець пагадненне, каб зрабіць яго больш зразумелым за кошт «прасцейшай мовы і прыкладаў». Напрыклад, Adobe ужо адрэдагавала першапачатковы тэкст змяненняў, аднак гэта не пераканала многіх карыстальнікаў. Таксама распрацоўшчык паказаў, што кліенты могуць адмовіцца ад удзелу ў праграме паляпшэння прадуктаў кампаніі.