Прэпарат, распрацаваны з дапамогай штучнага інтэлекту, знізіў разліковы біялагічны ўзрост пацыентаў на тэрмін да шасці гадоў. Вынікі ранняга даследавання былі апублікаваны ў Nature Biotechnology.
Прэпарат, распрацаваны з дапамогай штучнага інтэлекту, знізіў разліковы біялагічны ўзрост пацыентаў на тэрмін да шасці гадоў. Вынікі ранняга даследавання былі апублікаваны ў Nature Biotechnology.
Гаворка ідзе пра рэнтасертыб, які кампанія Insilico Medicine распрацоўвае для лячэння ідыяпатычнага лёгачнага фіброзу — захворвання, пры якім у лёгкіх утвараецца рубцавая тканіна. Даследчыкі паўторна прааналізавалі ўзоры крыві 42 пацыентаў, якія ўдзельнічалі ў 12-тыднёвым клінічным выпрабаванні прэпарата.
Для аналізу выкарысталі шэсць незалежных ШІ-мадэляў, якія ацэньваюць біялагічны ўзрост па складзе бялкоў крыві. Усе шэсць паказалі зніжэнне разліковага ўзросту ў пацыентаў, якія атрымлівалі рэнтасертыб, у параўнанні з групай плацэба.
Найбольш прыкметны эфект назіраўся праз чатыры тыдні: у адной з груп ён складаў каля трох-чатырох гадоў, а асобная мадэль паказала зніжэнне да шасці гадоў.
«Мяне пераконвае не маштаб эфекту, а згоднасць вынікаў, бо гэтыя мадэлі не выкарыстоўваюць аднолькавыя прыкметы і навучальныя дадзеныя», — заявіў нобелеўскі лаўрэат па хіміі Майкл Левіт у прэс-рэлізе кампаніі.
Пры гэтым зніжэнне паказчыкаў біялагічнага ўзросту не азначае, што пацыенты сапраўды памаладзелі на некалькі гадоў. Змены бялкоў могуць быць звязаныя з паляпшэннем працы лёгкіх і памяншэннем нагрузкі на арганізм.
Даследчыкі адзначаюць, што дазіроўка, якая найбольш паляпшала функцыю лёгкіх, адрознівалася ад той, якая давала найбольшае зніжэнне разліковага ўзросту. Гэта дапускае асобны эфект на працэсы старэння, але не даказвае яго.
«Прэпарат выглядае шматабяцальна. Але ў нас пакуль няма канчатковага клінічнага выпрабавання, якое дазволіла б вынесці канчатковае суджэнне», — распавёў кардыёлаг Эрык Топал.
Прафесар Гарвардскай медычнай школы Вадзім Гладышаў таксама паказаў на невялікі памер выбаркі і абмежаваную надзейнасць біялагічных гадзіннікаў. Паводле яго, неабходна праверыць прэпарат на здаровых людзях: пакуль вынікі могуць адносіцца толькі да пацыентаў з захворваннем лёгкіх.
Рэлацыраваліся? Цяпер вы можаце каментаваць без верыфікацыі акаўнта.