60% амерыканцаў хочуць авертайміць, каб крыху больш зарабляць

Паводле даследавання маркетынгавай кампаніі Qualtrics, 57% рэспандэнтаў «хочуць мець магчымасць працаваць звышурочна і ў дадатковыя змены», каб прынесці ў сям’ю больш грошай. Сярод рэспандэнтаў з дзецьмі доля такіх была 60%.

Апытанне праводзілася ў жніўні-верасні сярод 1+ тысячы амерыканцаў ва ўзросце ад 18 гадоў, якія працуюць на поўную стаўку.

Летась супрацоўнікі ў ЗША масава звальняліся ў асноўным таму, што працадаўцы не шанавалі іх, або праз выгаранне. Цяпер тэмпы «вялікага звальнення» ўсё яшчэ перавышаюць перадпандэмійныя, аднак падштурхоўвае людзей да гэтага фінансавае пытанне.

64% апытаных заявілі, што аплачваць выдаткі стала складаней. Амаль 70% працоўных бацькоў адказалі, што іх заробкі не паспяваюць расці за цэнамі. Гаворка вядзецца ў тым ліку пра прадукты харчавання, транспарт і догляд дзяцей.

18% рэспандэнтаў для скарачэння выдаткаў пераехалі ў гарады, дзе цэны «кусаюцца» менш, а яшчэ 13% збіраюцца так паступіць. Працоўныя бацькі пераязджаюць для эканоміі ў два разы часцей, чым тыя, хто не мае дзяцей.

37% удзельнікаў даследавання знаходзяцца ў пошуку іншай, больш высокааплатнай працы, а звыш паловы ўжо шукалі або плануюць шукаць другую працу.