Apple купіла яшчэ адзін французскі АІ-стартап

Угода была закрытая яшчэ 17 снежня 2023 года, аднак у дакументах Еўракамісіі звесткі пра яе былі апублікаваныя толькі цяпер. Фінансавыя дэталі ўгоды не раскрываюцца. Эксперты лічаць, што набыццё французскага стартапа — гэта частка стратэгіі Apple па ўкараненні штучнага інтэлекту ў сваіх прылады. Чакаецца, што кампанія раскажа пра планы падчас рэлізу iOS 18.

Datakalab была заснаваная Ксаўе і Люкай Фішэрамі ў 2016 годзе. Стартап засяроджаны на распрацоўцы маламагутных і эфектыўных алгарытмаў глыбокага навучання, здольных працаваць без прыцягнення воблачных рэсурсаў. Apple плануе рабіць стаўку ў інтэграцыі АІ на лакальнай апрацоўцы даных, што зводзіць да мінімуму пагрозу ўцечкі персанальных даных і забяспечвае хуткі водгук сістэмы.