Николай Чикишев 26 кастрычніка 2023, 11:13

Apple павысіла цэны на свае падпіскі ў ЗША і іншых краінах

Кампанія падняла цэны на некалькі сваіх прадуктаў, змены закрануць ЗША і «некаторыя міжнародныя рынкі».

Вырасце кошт падпіскі Apple TV + (ад $6,99 да $9,99 на месяц), Apple Arcade (ад $4,99 ад $6,99), Apple News+ (ад $9,99 да $12,99). Вырасце кошт адзінай падпіскі Apple One: індывідуальны план — ад $16,95 да $19,95, сямейны — ад $22,95 да $25,95, прэміяльны — ад $32,95 да $37,95.

Цяперашнія падпісчыкі сэрвісаў убачаць павышэнне цэн праз 30 дзён, у дзень наступнага падаўжэння падпіскі. Гэта першае павышэнне цаны на Apple Arcade і Apple News+ ад моманту іх запуску ў 2019 годзе. Цэны Apple TV+, Apple Music і Apple One апошні раз павялічвалі ў кастрычніку 2022 года.

Усе гэтыя сэрвісы з’яўляюцца часткай бізнэсу Apple па аказанні паслуг. Выручка сегмента ў апошнім фінансавым квартале склала $21,21 мільярда, што робіць яго другім па велічыні бізнэсам Apple пасля iPhone, выручка якога за той жа перыяд склала $39,67 мільярда.

CNBC адзначае, што гэты бізнэс надзвычай прыбытковы і важны для інвестараў, паколькі ён сігналізуе аб тым, як Apple манетызуе сваю актыўную базу з 2 мільярдаў прылад, прадаючы ім падпіскі, патокавае тэлебачанне, гарантыі, рэкламу, плацежныя сэрвісы і іншыя прадукты, якія ўваходзяць у гэтую катэгорыю.