Apple прыпыніла працу над новым пакаленнем VR-гарнітуры

Apple планавала выкаціць дзве версіі гарнітуры — Pro і даступнейшую стандартную мадэль. За апошні год прыярытэт першай з іх зніжаўся, людзей на праект прызначалі ўсё менш.

Спачатку Apple спрабавала знізіць выдаткі на кампаненты першага пакалення гарнітуры і ўдасканаліць дысплэй для наступнага, але цяпер прыпыніла працу над новай Vision Pro — пра гэта яна паведаміла па меншай меры аднаму свайму пастаўшчыку. Бюджэтная версія са сціплейшым функцыяналам па-ранейшаму ў працы.

Распрацоўка таннай мадэлі Vision пад кодавай назвай N109 пачалася ў 2022 годзе. Прадаваць яе плануецца прыкладна па цане топавага айфона — такі смартфон у розніцы каштуе да $1600. Выпусціць яе кампанія першапачаткова збіралася пры канцы гэтага года, але станам на яго пачатак цалкам гатовага прататыпа яшчэ не было. Apple спрабуе і не можа прыдумаць, як зрабіць яе таннейшай, моцна не ахвяруючы функцыяналам. Рэліз, верагодна, адкладзецца на канец 2025-га.

Пры гэтым Тhe Information дапускае, што ў будучыні Apple можа аднавіць працу над Vision Pro 2.