Apple удвая зменшыла камісію для міні-аплікацый у App Store

Міні-аплікацыі Apple вызначае як «самадастатковыя» вэб-модулі, створаныя на HTML5 і JavaScript і ўбудаваныя ў буйныя натыўныя аплікацыі. Яны могуць уключаць міні-гульні, чат-боты, плагіны, стрымінгавыя сэрвісы або старонні функцыянал. Такія модулі падтрымліваюцца правіламі App Store з 2017 года.

Для ўдзелу ў новай праграме распрацоўшчыкі павінны выканаць шэраг умоў: асноўная аплікацыя павінна быць апублікавана ў App Store пад iOS або iPadOS, адпавядаць ліцэнзійнаму пагадненню Apple Developer Program і правілам App Review, уключаючы спецыяльна прапісаную катэгорыю 4.7, якая рэгулюе працу міні-аплікацый.

Акрамя таго, удзельнікі абавязаны выкарыстоўваць шэраг тэхналогій Apple, уключаючы Advanced Commerce API і Declared Age Rating API, якія забяспечваюць карэктную апрацоўку пакупак і ўзроставых абмежаванняў. Плацяжы ў міні-аплікацыях павінны праходзіць праз сістэму In-App Purchase, а дадзеныя аб транзакцыях — перадавацца Apple ў выпадку запыту на вяртанне сродкаў.

У кампаніі пазіцыянуюць праграму як спосаб стымуляваць распрацоўшчыкаў развіваць міні-экасістэмы ўнутры буйных аплікацый, уключаючы гульнявыя платформы, месэнджары і сэрвісы, якія прапануюць старонніе модулі. Зніжэнне камісіі таксама падахвочвае стваральнікаў укараняць інструменты Apple для бяспекі, мадэрацыі і манетызацыі.

На рынку міні-аплікацый ужо дзейнічаюць буйныя гульцы: у Кітаі WeChat прапануе мільёны ўбудаваных сэрвісаў, а ў ЗША і іншых краінах міні-модулі даступныя, напрыклад, у Discord. У 2024–2025 гадах у гэтую нішу актыўна ўвайшлі і ШІ-платформы: OpenAI запусціла паўнавартасныя міні-аплікацыі ўнутры ChatGPT, уключаючы Booking.com, Spotify, Canva, Expedia, Coursera і іншыя сэрвісы.

Некаторыя эксперты меркавалі, што такія платформы могуць стаць альтэрнатыўным каналам дыстрыбуцыі аплікацый і патэнцыйнай пагрозай для App Store. Па дадзеных Bloomberg, Apple і Tencent раней дамовіліся аб 15-працэнтнай камісіі для міні-аплікацый WeChat, аднак праграма не была адкрытай. Новы запуск робіць гэтыя ўмовы даступнымі для шырокага кола распрацоўшчыкаў па ўсім свеце.