Алеся Чапкевич bel 25 сакавіка 2026, 10:52

Банкрутуе кампанія, якая рабіла платформу для сачэння за беларусамі і звязана з Synesis

Эканамічны суд Мінска ўзбудзіў вытворчасць па справе аб банкруцтве кампаніі «24×7 Паноптэс», заўважыў Office Life.

Кампанія была зарэгістравана ў 2016 годзе. З канца мінулага года знаходзіцца ў працэсе ліквідацыі. Зараз у ёй толькі адзін удзельнік.

Памер крэдыторскай запазычанасці, уключанай у рэестр патрабаванняў крэдытораў, складае 5,3 млн рублёў. З актываў у кампаніі ёсць 10,2 тысячы рублёў на банкаўскім рахунку.

У 2017 годзе «24×7 Паноптэс» стала тэхнічным аператарам рэспубліканскай сістэмы маніторынгу грамадскай бяспекі. Кампанія распрацавала платформу, якая ўключала комплекс праграмных модуляў для апрацоўкі відэапатокаў і дадзеных з сістэм відэаназірання, модулі аналітыкі, сэрвісы апавяшчэння карыстальнікаў, сродкі пошуку аб’ектаў і падзей у вялікіх аб’ёмах дадзеных і сродкі размежавання доступу і інфармацыйнай бяспекі.

У 2022 годзе з-за сувязі з Synesis яна трапіла пад санкцыі ЗША. Між тым «Белтэлекам» атрымаў статус адзінага аператара сістэмы маніторынгу грамадскай бяспекі. Дзяржпрадпрыемства і кампанія «сфарміравалі моцны тандэм», мадэрнізаваўшы і пашырыўшы сістэму маніторынгу.