Кліенты аргентынскага Banco Galicia з Беларусі і Расіі, якім у канцы кастрычніка без папярэджання закрылі рахункі, рыхтуюць калектыўны іск да банка, паведамляе Frank Media са словаў пацярпелых. Galicia быў заснаваны ў 1905 годзе і з’яўляецца найбуйнейшым прыватным банкам Аргентыны паводле памеру дэпазітаў і крэдытаў.
Кліенты аргентынскага Banco Galicia з Беларусі і Расіі, якім у канцы кастрычніка без папярэджання закрылі рахункі, рыхтуюць калектыўны іск да банка, паведамляе Frank Media са словаў пацярпелых. Galicia быў заснаваны ў 1905 годзе і з’яўляецца найбуйнейшым прыватным банкам Аргентыны паводле памеру дэпазітаў і крэдытаў.
Адвакаты прапануюць два шляхі: кліентаў, якія карысталіся рахункам для асабістых патрэбаў, аб’яднаюць у калектыўны іск у абарону правоў спажыўцоў, а для бізнес-рахункаў прадугледжаныя індывідуальныя прэтэнзіі.
Ісцы намераныя дамагацца прызнання дзеянняў банка незаконнымі і дыскрымінацыйнымі, іх спынення і кампенсацыі даказанай шкоды. Для заблакіраваных сродкаў асобна абмяркоўваецца вяртанне з магчымымі працэнтамі. Вярнуць кліентам рахункі адвакаты не абяцаюць.
Да 8–9 лістапада арганізатары збіраюць анкеты пацярпелых, пасля гэтага на працягу 7–10 дзён будуць рыхтаваць і падаваць іск. Паспець хочуць да канца лістапада, а само разбіральніцтва можа заняць адзін-два гады.
Колькі чалавек увойдзе ў іск, пакуль невядома. На сустрэчы з адвакатамі гучала ацэнка больш чым у 600 пацярпелых. Арыенцірам арганізатары называюць не менш за 100 удзельнікаў, гатовых падпісаць іск.
Масавае закрыццё рахункаў пачалося ўвечары 28 кастрычніка. Большасць кліентаў даведалася пра гэта, калі ў іх не прайшла аплата картай. Рахункі і карты проста зніклі з дадатку банка.
Афіцыйнай прычыны там не назвалі. Супрацоўнікі аддзяленняў і службы падтрымкі тлумачылі кліентам закрыццё «камерцыйным рашэннем» і «палітыкай рызык» банка, а некаторым — сумніўнымі аперацыямі праз брокера або непацверджанымі выдаткамі. Адной кліентцы ў чаце падтрымкі напісалі пра «масавую памылку», якая закранула частку ашчадных рахункаў, а іншай кліентцы ў аддзяленні сказалі, што рашэнне датычыла менавіта расіянаў.
Агульным у пацярпелых удзельнікі чата лічаць месца нараджэння. Па іх словах, пад закрыццё трапілі ўраджэнцы Расіі, Беларусі, Казахстана і Кыргызстана. Сярод пацярпелых ёсць людзі, якія ўжо атрымалі грамадзянства Аргентыны і адкрывалі рахунак паводле аргентынскіх дакументаў, уладальнікі МПЖ і ВНЖ, уладальнікі заробкавых рахункаў мясцовых працадаўцаў і як мінімум адна кампанія. Паводле пацярпелых, сярод іх ёсць людзі, якія жывуць у краіне 15–25 гадоў.
Спачатку адна з версій блакіроўкі была звязана з крыптавалютнымі і P2P-аперацыямі, аднак яна не пацвердзілася. Рахункі закрывалі і тым, хто атрымліваў пераводы з-за мяжы, і тым, хто карыстаўся толькі песа. Аднаму кліенту закрылі рахунак, адкрыты ў снежні 2025 года і ні разу не выкарыстаны. Пры гэтым у часткі кліентаў з расійскім пашпартам рахункі працягваюць працаваць. Колькі ўсяго рахункаў было закрыта ў Galicia, невядома.
Паводле аргентынскіх правілаў, пры закрыцці ашчаднага рахунку паводле ўласнага рашэння банк абавязаны паведаміць кліенту замоўным лістом не менш чым за 30 каляндарных дзён. Удзельнікі чата ніякіх папярэджанняў не атрымлівалі.
Частка кліентаў сутыкнулася з валютным абмежаваннем: іх рахункі ў песа працуюць, але купляць і прадаваць долары яны не могуць. Уваходныя пераводы па SWIFT банк вяртае адпраўнікам. У іншых банках тыя ж кліенты куплялі долары без праблем.
Рэшткі на закрытых рахунках банк выдае толькі наяўнымі ў касе аддзялення. Часам кліентаў накіроўваюць у аддзяленне, дзе была выпушчаная картка.
Яшчэ адна праблема датычыць пераводаў, адпраўленых незадоўга да закрыцця рахункаў: у некаторых кліентаў знешнія пераводы дайшлі да банка, але ў дадатку Galicia грошы так і не з’явіліся.
Крэдытныя карты ў часткі кліентаў з закрытымі рахункамі працягваюць працаваць, запазычанасць па іх захоўваецца. Аднак аднаму кліенту ў аддзяленні сказалі, што крэдыткі, хутчэй за ўсё, таксама заблакіруюць. Тэрміновыя ўклады банк датэрмінова не вяртае. Аднаму кліенту з доларавым укладам сказалі, што выдаць грошы немагчыма, бо рахункі закрытыя.
Релоцировались? Теперь вы можете комментировать без верификации аккаунта.