У AXIOS бясплатна могуць трапіць стартапы з любой лакацыі, уключаючы тыя, што працуюць у Беларусі. Першы паток плануецца зрабіць для рускамоўных каманд, «каб паглядзець, як усё працуе».
AXIOS ужо адкрыў набор стартапаў. На сёння ўжо ёсць каля 20 заявак.
— Мы хацелі б узяць 15-20 каманд. Але ўсё будзе залежаць ад колькасці прыцягнутых спецыялістаў, якія змогуць суправаджаць каманды, — растлумачыў фаўндар AXIOS. Ён дадаў, што акселератар не будзе спыняць прыём заявак, каб у тым ліку сфармаваць пул праектаў для наступнай праграмы.
Адукацыйная праграма акселератара разлічаная на 15 тыдняў і ўключае 3 асноўныя блокі адукацыйных трэнінгаў: прадукт, маркетынг, фінансы.
— У рамках акселератара мы дапаможам стварыць прадукт і яго пратэсціраваць. Каб людзі самі паглядзелі, ці заходзіць іхняя ідэя, ці не.
Цяпер вядзем перамовы з ментарамі, у асноўным з Беларусі, якія будуць весці асобныя лекцыі, дзяліцца сваім асабістым досведам. Таксама вядзем перамовы з экспертамі рынку, якія змогуць падзяліцца інфармацыяй па канкрэтнай тэме, — расказаў Сяргей Красаковіч.
Акрамя таго, паводле слоў фаўндара, ёсць ідэя зрабіць асобныя лекцыі адкрытымі і запрасіць на іх прадпрымальнікаў.
Канцэпцыя AXIOS не прадугледжвае фінансавання стартапаў, якія трапяць у акселератар. «Але мы будзем звязваць праекты з тымі, хто можа дапамагчы з інвестыцыямі», — удакладніў фаўндар.
Запуск праграмы запланаваны на 8 кастрычніка. AXIOS будзе працаваць пераважна ў інтэрнэце. Таксама запланавана некалькі афлайн мерапрыемстваў, у прыватнасці, для пітчынгу і нэтворку.
Demo day плануецца правесці ў студзені 2025 года. Паводле слоў Сяргея Красаковіча, хутчэй за ўсё, Demo day пройдзе не на тэрыторыі Польшчы. Акселератар атрымаў запрашэнне правесці яго ў іншай краіне.
Рэлацыраваліся? Цяпер вы можаце каментаваць без верыфікацыі акаўнта.