Як падаць заяву аб пераносе пенсіі ў Польшчу — вопыт беларускі

У лютым 2019 года было заключанае Пагадненне аб сацыяльным забеспячэнні паміж Польшчай і Беларуссю. Яно абараняе правы грамадзян РБ і РП у частцы выплаты пенсій і дапамог. Так, пагадненне дазваляе падсумаваць страхавыя стажы ў дзвюх краінах, а яшчэ — атрымліваць беларускую пенсію ў Польшчы і наадварот. Праўда, у кожнай краіне пенсіі прызначаюцца асобна. 

Dzik Pic расказаў гісторыю беларускі, чыя мама проста цяпер пераводзіць пенсію з Беларусі ў Польшчу.

— Да восені 2023-га мама проста атрымлівала сваю пенсію на беларускую карту, і людзі ў Беларусі здымалі грошы для нас па даверанасці. Але потым даверанасці забаранілі афармляць за мяжой, і мы задумаліся аб пераносе пенсіі ў Польшчу.

Спачатку прачыталі пра сутнасць пагаднення на сайце ZUS. Там шмат розных варыянтаў — у асноўным пра тое, як улічыць стаж працы ў абедзвюх краінах. У мамы быў прасцейшы варыянт — стаж толькі ў Беларусі. Таму мы проста напісалі ў ZUS просьбу аб пераводзе пенсіі на рахунак у Польшчы ў сувязі з пераносам цэнтра жыццёвых інтарэсаў у Польшчу. 

Карту побыту не прасілі — прынамсі, не рабілі копіі, проста паглядзелі. Дзесьці на пачатку лістапада прыйшлі, напісалі ўнёсак, прымацавалі дакументы: у маміным кейсе — проста яе пенсійнае пасведчанне і картку сацстрахавання (зялёную), даныя пра рахунак у банку, і ўсё.

Напэўна, калі рабіць пенсію з нуля, спатрэбіцца яшчэ копія працоўнай, даведаюся праз некалькі гадоў, калі буду афармляць пенсію ўжо сабе.

Пасля падачы мы стварылі рахунак на ZUS PUE для мамы для прасцейшай карэспандэнцыі. Праз тры тыдні нам напісалі, што справа пайшла ў Беларусь.

Кажуць, што адказу чакаць у сярэднім паўгода. Ад снежня 2023-га і да канца красавіка нічога не было чуваць. А потым прыйшоў ліст з ФСАН — 8 лістоў з інфармацыяй. Выглядае як набор дакументаў, які трэба перадаць у мясцовы ZUS. Але там нам сказалі, што ў іх ужо ёсць копія, так што нічога рабіць не трэба. З тых часоў чакаем.

Чытачка абяцала расказаць пра вынікі.

Беларусь і Польшча дамовіліся пра пенсіі і бальнічныя. Тлумачым, як гэта працуе

Па тэме

Беларусь і Польшча дамовіліся пра пенсіі і бальнічныя. Тлумачым, як гэта працуе