CEO Microsoft назваў ключавы навык працаўнікоў у эпоху ШІ

У гутарцы з генеральным дырэктарам Axel Springer Мацiясам Дёпфнерам ён адзначыў, што аднаго высокага IQ больш недастаткова, паколькі ўсё больш тэхнічных задач цяпер выконваюць ШІ-сістэмы.

Па словах Надэлы, лідэры асабліва маюць патрэбу ва ўменні разумець іншых і выбудоўваць узаемадзеянне. «IQ важны, але ён не адзінае, што трэба. Калі ў лідара ёсць IQ без EQ, то гэты IQ проста марнуецца», — сказаў кіраўнік Microsoft. Ён дадаў, што сацыяльны інтэлект таксама становіцца крытычна важным, а эмпатыя — гэта не «мяккі», а паўнавартасны бізнес-навык.

Дёпфнер спытаў, ці звязана ўзмацненне ролі эмпатыі з тым, што Microsoft з пачатку наступнага года будзе актыўней вяртаць супрацоўнікаў у офіс. Надэла адказаў, што ва ўмовах развіцця ШІ важней за ўсё становіцца менавіта чалавечае супрацоўніцтва, а працоўнае месца — «лепшы інструмент для калабарацыі». Пры гэтым ён падкрэсліў, што не хоча быць дагматычным у пытаннях вяртання ў офіс.

Надэла ў апошнія месяцы перабудоўвае каманду Microsoft, каб узмацніць пазіцыі кампаніі ў гонцы ШІ. Ён прыцягнуў Рольфа Хармса, аднаго з архітэктараў поспеху Microsoft у воблачных тэхналогіях, у якасці дарадцы па эканоміцы ШІ і сфарміраваў новую каманду, якая зоймецца распрацоўкай сістэм суперінтэлекту.

Microsoft імкнецца наблізіцца да стварэння агульнага ШІ — тэхналогій, здольных перавышаць чалавека ў шырокім спектры задач. На фоне гэтых змяненняў кампанія таксама скараціла тысячы супрацоўнікаў, патлумачыўшы гэта аптымізацыяй працэсаў, а не зніжэннем эфектыўнасці працаўнікоў.