Кампанія рыхтуе найбуйнейшае абнаўленне ChatGPT з моманту запуску сервісу. Паводле дадзеных Financial Times, OpenAI хоча ператварыць чат-бот у «суперап» з ШІ-агентамі, інструментамі для праграмавання і падключэннем знешніх сэрвісаў.
Кампанія рыхтуе найбуйнейшае абнаўленне ChatGPT з моманту запуску сервісу. Паводле дадзеных Financial Times, OpenAI хоча ператварыць чат-бот у «суперап» з ШІ-агентамі, інструментамі для праграмавання і падключэннем знешніх сэрвісаў.
Выданне адзначае, што змены звязаныя з больш шырокай перабудовай OpenAI. Кампанія перамяркоўвае рэсурсы ў бок карпаратыўных кліентаў, больш прыбытковых прадуктаў і канкурэнцыі з Anthropic, якая актыўна расце на рынку ШІ-агентаў і інструментаў для распрацоўкі.
Адным з галоўных напрамкаў стане Codex — прадукт OpenAI для праграмавання і працы з кодам. Паводле дадзеных Financial Times, OpenAI плануе даць яму больш месца ў інтэрфейсе ChatGPT і накіраваць на яго больш рэсурсаў. Абнаўленні маюць з’явіцца ў бліжэйшыя тыдні ў вэб-версіі і мабільных дадатках ChatGPT.
Кампанія таксама хоча змяніць інтэрфейс ChatGPT так, каб карыстальнікі часцей звярталіся не толькі да звычайнага чату, але і да функцый генерацыі кода, выяваў і партнёрскіх сервісаў. Сярод магчымых інтэграцый газета называе Canva і Booking.com.
«Чат памёр», — сказаў журналістам адзін са старэйшых супрацоўнікаў OpenAI, апісваючы новы курс кампаніі. Ідэя ў тым, што ChatGPT павінен стаць не проста акном для перапіскі з мадэллю, а персанальным агентам, які дапамагае карыстальніку ў розных задачах — ад працы да паўсядзённых справаў.
OpenAI таксама разлічвае павялічыць долю выручкі ад бізнесу. Цяпер каля 2 мільёнаў кампаній даюць прыкладна 40% даходаў OpenAI, а да канца года кампанія чакае росту гэтай долі да 50%. Пры гэтым у ChatGPT ужо больш за 900 мільёнаў штотыднёвых актыўных карыстальнікаў і больш за 50 мільёнаў платных спажывецкіх падпісчыкаў.
Перабудова адбываецца на фоне падрыхтоўкі OpenAI да магчымага выхаду на біржу. Reuters раней паведамляла, што кампанія рыхтуе канфідэнцыяльную заяўку на IPO ў ЗША, хаця генеральны дырэктар OpenAI Сэм Альтман казаў, што кампанія не прывязана да канкрэтных тэрмінаў і выйдзе на біржу, калі гэта будзе мець сэнс.
Релоцировались? Теперь вы можете комментировать без верификации аккаунта.