Николай Чикишев world 21 жніўня 2026, 15:44

Якім ШІ лепш не давяраць асабістыя дадзеныя — рэйтынг з 13 сервісаў

Сервіс Incogni параўнаў 13 папулярных ШІ-платформаў і ацаніў, наколькі іх праца з карыстальніцкімі дадзенымі можа пагражаць канфідэнцыяльнасці.

Пакінуць каментарый

Якім ШІ лепш не давяраць асабістыя дадзеныя — рэйтынг з 13 сервісаў

Сервіс Incogni параўнаў 13 папулярных ШІ-платформаў і ацаніў, наколькі іх праца з карыстальніцкімі дадзенымі можа пагражаць канфідэнцыяльнасці.

Даследчыкі ацэньвалі, якія дадзеныя збіраюць ШІ-платформы, ці выкарыстоўваюцца размовы для навучання мадэляў, ці можна адмовіцца ад такога выкарыстання, каму перадаецца інфармацыя і наколькі зразумела ўсё гэта апісана ў палітыках канфідэнцыяльнасці. Чым меншы выніковы бал, тым ніжэйшая меркаваная рызыка.

Найлепшы вынік атрымаў Vibe ад Mistral AI, раней вядомы як Le Chat. Даследчыкі адзначылі зразумелую палітыку канфідэнцыяльнасці, адносна невялікую колькасць трэціх бакоў, якім перадаюцца дадзеныя, і больш памяркоўныя налады мабільнага дадатку.

На другім месцы апынуўся ChatGPT. Incogni вылучыла простыя правілы працы з дадзенымі і магчымасць адносна лёгка адмовіцца ад выкарыстання размоваў для навучання мадэляў. Пры гэтым OpenAI наўпрост ўказвае, што частка інфармацыі можа апрацоўвацца ў мэтах бяспекі і маркетынгу.

Адной з галоўных заўваг да Gemini стала тое, што сервіс абапіраецца на агульную палітыку канфідэнцыяльнасці Google. Праз вялікую колькасць іншых прадуктаў кампаніі даследчыкам аказалася складаней зразумець, якія менавіта дадзеныя Gemini збірае і як выкарыстоўвае.

У выпадку Claude Incogni адзначыла падрабязную дакументацыю Anthropic, але звярнула ўвагу на змяненне палітыкі летам 2026 года: па ацэнцы даследчыкаў, цяпер карыстальнікам даводзіцца асобна адмаўляцца ад выкарыстання пэўных дадзеных для навучання.

Grok атрымаў больш высокі ўзровень рызыкі праз магчымасці перадачы інфармацыі афіліяваным кампаніям і выкарыстання публічных публікацый у X для навучання мадэляў.

Апошнія тры месцы занялі Kimi, Meta AI і Microsoft Copilot. Meta AI даследчыкі назвалі самым «прагным» да карыстальніцкіх дадзеных сервісам у выбарцы. У Copilot асноўнай праблемай сталі шырокая палітыка канфідэнцыяльнасці, перадача дадзеных трэцім рэкламадаўцам і, па дадзеных Incogni, атрыманне інфармацыі ад дата-брокераў.

Пры гэтым аўтары даследавання падкрэсліваюць, што рэйтынг не азначае, быццам адзін сервіс аўтаматычна бяспечны, а іншы — не. Ніводная з разгледжаных платформаў не дазваляе карыстальніку выдаліць свае дадзеныя пасля таго, як яны ўжо былі выкарыстаныя для навучання мадэлі.