Codex навучыўся кіраваць кампутарамі на Windows — сачыць за ім можна са смартфона

OpenAI таксама дадала падтрымку Windows у мабільным дадатку ChatGPT. Цяпер карыстальнік можа запусціць задачу на кампутары, а потым сачыць за яе выкананнем са смартфона, дасылаць удакладненні і кіраваць працэсам дыстанцыйна, пакуль праца працягваецца на ПК.

Windows users, this one’s for you.

Computer use now works on Windows, so Codex can take action on your Windows computer.

And with Windows support for Codex in the ChatGPT mobile app, you can start, review, and steer tasks on the go while work continues on your Windows machine.… pic.twitter.com/OPIxOcP4Nl

— OpenAI (@OpenAI) May 29, 2026

Функцыя ператварае Codex з інструмента для працы з кодам у больш універсальнага ШІ-агента. Яго можна выкарыстоўваць для задач, якія патрабуюць узаемадзеяння са звычайным інтэрфейсам: тэставання праграм, узнаўлення памылак, праверкі кода, змены налад або працы з некалькімі праграмамі.

Каб уключыць рэжым на кампутары, трэба адкрыць налады Codex, перайсці ў раздзел Computer Use і дазволіць агенту выкарыстоўваць праграмы. Пасля гэтага ў запыце можна паказаць увесь кампутар або канкрэтную праграму, з якой павінен працаваць Codex.

Для падключэння смартфона трэба адкрыць раздзел Connections: дадатак пакажа QR-код, які патрэбна адсканаваць у мабільнай версіі ChatGPT. Пасля гэтага з тэлефона можна запускаць новыя задачы, працягваць пачатыя, пацвярджаць дзеянні і правяраць ход выканання.

OpenAI падкрэслівае, што гэта ранняя версія функцыі. Кампанія працуе над дадатковымі сцэнарамі, каб карыстальнік мог працягваць працу з Codex незалежна ад таго, знаходзіцца ці ён за кампутарам або кіруе задачай з тэлефона.