Cybertruck зроблены з нержавейкі, але дождж пра гэта не ведаў: уладальнікі пікапаў скардзяцца на іржу

Карыстальнік форуму Cybertruck Owners Club пад нікам Raxar забраў свой электракар 1 лютага. Кансультант адразу папярэдзіў яго, што пад дажджом на кузаве могуць з’яўляцца аранжавыя плямы іржы, якія трэба будзе зачысціць. Паводле слоў аўтаўладальніка, яны пачалі праступаць ужо праз два дні пад дажджом.

Карыстальнік Vertigo3pc на тым жа форуме расказаў, што адбуксіраваў свой кібертрак у сэрвісны цэнтр пасля дажджу. Як і іншыя ўладальнікі Cybertruck, ён заўважыў на метале карозію і вырашыў прыцягнуць увагу вытворцы да праблемы. У цэнтры зафіксавалі дэфект і сказалі, што могуць ліквідаваць яго. Плямы ішлі па ўсім метале.

У кіраўніцтве па эксплуатацыі Cybertruck (Tesla пакуль не выклала яго ў адкрыты доступ) адзначаецца, што на кузаве электракара з нержавеючай сталі няма празрыстага пакрыцця. У ім таксама гаворыцца, што, каб пазбегнуць пашкоджанняў на вонкавай паверхні кібертрака, з яго трэба неадкладна выдаляць субстанцыі, якія могуць прывесці да карозіі, напрыклад тлушч, масла, птушыны памёт, драўняную смалу, мёртвых насякомых, дарожную соль і іншае.

У верасні Ілан Маск казаў, што Tesla можа ў якасці варыянта пачаць прапаноўваць кліентам нанесці пакрыццё з карбіду вальфраму, якое абароніць аўто ад драпін і карозіі.

Але гэта не адзінае слабое месца кібертрака. Браніраваныя вокны таксама выявіліся не такімі ўжо і трывалымі — яны не вытрымалі ўдару кувалдай проста на прэзентацыі ў 2019 годзе.