devby прызналі. Як нам усім цяпер з гэтым жыць (і што чысціць)

Якія менавіта пляцоўкі прызналі?

Вось гэтыя:

1. сайт devby.io,
2. тэлеграм-канал «devby: галоўныя ІТ-навіны Беларусі»,
3. бот старонку кантактаў,
4. і бот @hello_devby_bot (рэкламны). 

Што будзе з рэдакцыяй? 

Мы, вядома, працягнем працаваць.

Цяпер гэта стане складаней, але мы ўжо праходзілі праз цяжкасці разам з вамі. Верагодна, на сайце стане яшчэ больш ананімных герояў — але ўсе ўжо прывыклі. 

Што рабіць чытачам?

Калі жывяце або бываеце у Беларусі:

1. Адпішыцеся ад тэлеграма.
2. Не дзяліцеся спасылкамі на наш сайт і тэлеграм. 
3. Знайдзіце і выдаліце ўсюды любыя рэпосты, спасылкі, скрыншоты, захаваныя публікацыі і пасты, закладкі ў браўзеры, архівы. Нават эмадзі пад пастамі. Імэйлы, якія вы пісалі рэдакцыі. Увогуле, любы «статычны» след вашага ўзаемадзеяння з нашым кантэнтам на сайце і ў тэлезе. Папярэдзьце тых, з кім вы маглі падзяліцца такімі спасылкамі, скрынамі.
4. Трэба ачысціць кэш у тэлеграме (як гэта зрабіць). 
5. І ўвогуле рэгулярна чысціць у сацсетках і браўзерах кэш, архіў, гісторыі запытаў, наведванняў.
6. Не каментуйце матэрыялы на сайце. Праверце, ці былі на сайце каменты пад вашым сапраўдным імем. Выдаліце або звяжыцеся з намі.
7. Пра нашых ботаў — інструкцыя ніжэй.

Каб хутчэй знайсці файлы ў Telegram, можна скарыстацца радком пошуку ў мабільным дадатку (інструкцыя ад CyberBeaver). 

Усё гэта можа лічыцца «захоўваннем і распаўсюджваннем» экстрэмісцкіх матэрыялаў. За гэта ёсць адміністрацыйная адказнасць паводле арт. 19.11 КаАП. Можа быць штраф да 500 базавых або арышт да 15 сутак за кожнае супрацьпраўнае дзеянне (напрыклад, адзін лайк). 

А папросту чытаць вас можна?

Так! Чытаць — можна і трэба. Можна чытаць нават наш тэлеграм — без падпіскі. 

Яшчэ можна захоўваць і распаўсюджваць змест нашых матэрыялаў без прамой спасылкі і ўказання нашага аўтарства. 

Калі вы ў Беларусі, уключайце VPN, рэжым інкогніта ў браўзеры. Карыстайцеся люстэркамі. І не забывайце чысціць кэш!

А што з вашымі ботамі? 

Калі вы пісалі нам паведамленні — ачысціце гісторыю, затым выдаліце сам бот.

Са свайго боку, мы выдалілі абодва боты — старонку кантактаў і @hello_devby_bot. Пасля гэтага імя і URL ботаў у карыстальнікаў не відаць, адлюстроўваецца як deleted account.

Мы не захоўваем вашы паведамленні і кантакты.

Мы працуем над новымі бяспечнымі каналамі сувязі.

А што з рэсёрчамі?

Апытанні робяцца на typeform — не на сайце devby.

Пры гэтым нашы анкеты/формы не збіраюць ніякіх персанальных дадзеных — толькі ананімізаваныя адказы на пытанні.  

Я блогер, што мне рабіць? 

Мы закрылі раздзел «блогі» цалкам. Ён будзе заставацца недаступным, пакуль мы не звяжамся з усімі аўтарамі, каб кожны вырашыў асабіста, наколькі бяспечна яму заставацца на платформе — ананімна або публічна.

Вас вельмі шмат! Мы паспелі звязацца не з усімі аўтарамі, якія знаходзяцца па-за Беларуссю, і звяжамся з вамі ў бліжэйшы час. 

Вы таксама можаце напісаць нам https://devby.io/pages/contacts 

Пра мяне была публікацыя. Я нешта каментаваў_ла.

Гэта вельмі размытая гісторыя.

Фармальна для герояў «экстрэмісцкіх матэрыялаў» не прадугледжана нейкая адказнасць. Ва ўсякім выпадку, універсальна зразумелая ўсім удзельнікам беларускага медыяполя. 

У той жа час пры жаданні любое супрацоўніцтва з намі — і каментарыі, і інтэрв’ю, і рэгістрацыю ў ботах — могуць палічыць садзейнічаннем «экстрэмісцкай дзейнасці» (артыкул 361-4).

Увогуле, тут няма гарантый перасьледу — і няма гарантый таго, што за гэта нічога не будзе. Залежыць ад ступені цікавасці да канкрэтнага чалавека (або ад выпадковасці).

Вы можаце звязацца з намі, калі ў вас ёсць асцярогі або каментарыі:  https://devby.io/pages/contacts 

Блін, як жыць?

Дзень за днём :) Мы плануем заставацца з вамі да лепшых часоў і нават даўжэй.

Як вас падтрымаць?

Калі вы не ў Беларусі і гэта для вас бяспечна, то падтрымаць можна вось тут.

Мы дзякуем вам за падтрыманне, цяпер яно асабліва неабходнае.