Пераехаў і страціў працу — але за два тыдні знайшоў добрую. Хэпі-энд у крызіс

Лід-дызайнер Арцём тры месяцы таму пераехаў з сям’ёй з Мінска ў Чарнагорыю. Гэта было самастойнае рашэнне. Легалізаваўся, адкрыў рахункі, працягваў працаваць дыстанцыйна. А неўзабаве працадаўца ў Беларусі паставіў яго перад фактам, што кампанія закрываецца.

Што было рабіць? Ён размясціў пост у LinkedIn, які, здавалася, казаў пра сур’ёзныя перажыванні.

Праз два тыдні dev.by спытаў Арцёма, як той маецца. Выявілася, выдатна — дызайнер якраз перабіраў оферы. Зрабіўшы выбар, ён падзяліўся пазітыўнай гісторыяй пра тое, як хутка знайсці працу, нягледзячы на крызіс.

Чаму Чарнагорыя

— Я — астматык, а тут цёпла. Балтыка не можа даць мне патрэбнага клімату. Да таго ж легалізавацца тут прасцей. 

Як страціў працу

Нашая студыя працавала з еўрапейскімі архітэктурнымі бюро: рабілі для дывелапераў прэсэйлеры (3D-віды і туры), якія дапамагалі прадаваць жытло да будаўніцтва. Відавочных перадумоў таго, што кампанія закрыецца, не было. Але званочкі былі ўжо перад маім ад’ездам. Wise і Revolut замарозілі рахункі, на якіх знаходзіліся ўсе актывы кампаніі. Прычына — у заснавальнікаў пашпарты РБ.

Калі ў цябе пашпарт РБ і ты вядзеш бізнэс з замежнымі контрагентамі (не з РФ, РК, Грузіі ці Арменіі), табе нічога не застаецца, акрамя як перамясціцца ў іншую краіну. Але кіраўніцтва пакуль не можа выехаць. Кампанія прасіла банкі хаця б наконт вываду грошай. Revolut адзін раз дазволіў гэта зрабіць, а Wise нават не адказвае на запыты. 

Пасля некалькіх месяцаў барацьбы за рахункі мінская кампанія закрылася. Я на той час ужо легалізаваўся ў Чарнагорыі.

Як знайшоў працу за два тыдні

Мой досвед 12+ гадоў, я не стаў праглядаць вакансіі — ведаў, што рэкруцёры будуць мне пісаць. За гэты час я папрацаваў у 4 кампаніях, то-бок мой досвед інтэрв’ю не вельмі вялікі. Даведаўшыся пра закрыццё кампаніі, я таго ж вечара склаў пост і адправіў яго ў ChatGPT на рэдактуру. Звычайна я пішу ў дзелавым стылі, а тут хацелася ажывіць сваю гісторыю, каб яна атрымала большы водгук. Хітрыкаў у частцы змесціва не было, проста папрасіў ChatGPT зрабіць тэкст больш рэлевантным. 

Заліў у LinkedIn, прымацаваў CV і партфоліа на Dribbble. Назаўтра было ўжо 60K праглядаў. Агулам колькасць праглядаў за два тыдні пераваліла за 220К, яшчэ было амаль 4К рэакцый, 400+ рэпостаў і 100+ каментароў. Я атрымаў 30+ водгукаў ад працадаўцаў толькі ў LinkedIn (яшчэ пісалі ў тэлеграм і ў інсту) і ўвесь мінулы тыдзень правёў у сумоўях і выкананні тэставых. Штодзень змяшчаў па 3-4 сумоўі.

Мне пачалі прапаноўваць ад 2,5K, але я неўзабаве зразумеў, што цэннік трэба павышаць, і давёў зп да 3,5К еўра. Водгукі былі ад працадаўцаў з розных краін: РФ, Грузіі, Арменіі, Чарнагорыі, Кіпра, ЗША, пару з Беларусі. Стараўся адказаць усім, але фільтраваў спіс: калі бачыў, што кампанія займаецца тым, што мне не пасуе, адразу адмаўляўся. 

Не магу сказаць, што сутыкнуўся з неадэкватнай камунікацыяй на фоне крызісу. Так, былі выпадкі, калі мне не падабалася манера зносін арт-дырэктараў (была пара кейсаў — у Чарнагорыі і РФ), але нейкіх відавочных правалаў не было. У некаторых эйчараў выклікала пытанні партфоліа: мы бачым прыгожыя карцінкі, а ці ёсць працоўныя праекты? І былі здзіўлены, што праекты ў партфоліа і ёсць працоўныя.

Мая лакацыя некаторыя кампаніі не задавальняла. Было некалькі неспадзяванак. Кампанія з Беларусі, якая пастукалася адной з першых, прапанавала мне «магчымасць вярнуцца на радзіму». Я не палічыў гэтую прапанову добрай. Адказаў мякка: пэўна, застануся на месцы, пачакаю іншых магчымасцей. З Масквы пыталіся: што мы можам прапанаваць, каб вы перадыслакаваліся да нас.

Пыталіся пра пераезд на Кіпр. Мы б і не супраць, але мы толькі-толькі выдаткавалі шмат сіл і грошай, каб асталявацца тут. Да таго ж Кіпр нашмат даражэйшы за Чарнагорыю, і камфортна пачувацца з заробкам у 3,5K там не атрымаецца.

У выніку прайшоў 21 сумоўе і пры канцы другога тыдня атрымаў тры оферы:

— ад грузінскай геймдэў-кампаніі;
— ад неабанка ў Грэцыі;
— ад амерыканскай е-комерс-платформы.

Выбраў трэці варыянт. Я маю прывесці да ладу платформу, набраць каманду дызайнераў, каб паступова, выстаўляючы прыярытэтныя задачы, кампанія рухалася да заваёвы рынку.

Стоадсоткава прыйдуць яшчэ оферы: ёсць разважлівыя кампаніі з доўгім цыклам наймання, для якіх я выканаў парачку тэставых (пакуль рыхтавалі публікацыю, паступіў яшчэ адзін офер, ад іншага неабанка. — dev.by).

Магчыма, мая гісторыя камусьці падасца казкай. Але насамрэч нічога дзіўнага тут няма. Проста ў мяне сапраўды вялікі досвед. Шараговых джуніяр — і мідл-дызайнераў хоць гаць гаці. А людзей, які могуць узяць на сябе кіраванне камандай, выставіць прыярытэты ў працы над прадуктам, аналізаваць і рэсёрчыць, няшмат.

Іншыя фактары — раскручаны акаўнт на LinkedIn з вялікай колькасцю жывых, добрых кантактаў. Я не чакаў, што мой пост так стрэліць. ChatGPT — частка поспеху, але не факт.

Я разумеў, што рызыкоўна пакідаць Беларусь з аднагадовым дзіцем на руках. Але пакуль я задаволены. Адзіная сур’ёзная нязручнасць, якая здарылася за гэты час з маёй сям’ёй, — страта працы. Але я ведаў, што трэба проста пачакаць, пахадзіць па сумоўях — і ўсё будзе добра.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 210 чытачоў падтрымліваюць нас данатамі.

У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.