Музычны ШІ-стартап GRAI, заснаваны беларусамі, закрыў пасяўны раўнд на $9 млн, паведамляе TechCrunch. Каманда лічыць, што ШІ можа зрабіць музыку больш сацыяльнай, а не заменіць артыстаў, і хоча аддаць кантроль у іхныя рукі.
Музычны ШІ-стартап GRAI, заснаваны беларусамі, закрыў пасяўны раўнд на $9 млн, паведамляе TechCrunch. Каманда лічыць, што ШІ можа зрабіць музыку больш сацыяльнай, а не заменіць артыстаў, і хоча аддаць кантроль у іхныя рукі.
Яшчэ два сузаснавальнікі GRAI — тэхдырэктар Дзмітрый Камароўскі і прэзідэнт Андрэй Аўсіевіч. Раўнд узначалілі Khosla Ventures і Inovo VC. Сярод іншых інвестараў — Tensor Ventures, Tiny.VC, Flyer One Ventures, a16z Scout Fund, а таксама шэраг бізнес-анёлаў: сузаснавальнік Genova Labs Эндру Чжай, заснавальнік Unreal Labs Грэг Ткачэнка, заснавальнік Rhapsody Роб Рыд і ўкраінскі сузаснавальнік MirAI і Reface Дзмітрый Швец.
Сённяшнія музычныя ШІ-стартапы накшталт Suno і Udio прапануюць тэхналогіі для генерацыі музыкі з нуля. У GRAI думаюць, што большасць людзей хоча не ствараць музыку з нуля, а рабіць рэміксы, дзяліцца імі з сябрамі ці проста эксперыментаваць: змяняць стылі песень і гуляць з гукам — для забавы.
Цяпер GRAI працуе над некалькімі ШІ-прадуктамі: дадаткам для рэміксаў Music with Friends для iOS і пляцоўкай для эксперыментаў з музыкай на Android. Гэтыя і будучыя аплікацыі дапамогуць кампаніі зразумець, як карыстальнікі хочуць узаемадзейнічаць з музыкай і спажываць яе акрамя простага стварэння ці пасіўнага праслухоўвання ў эпоху ШІ.
Менавіта вакол гэтай ідэі будуецца кампанія, адзначыў кафаўндэр і СЕО Ілля Лесун. Паводле яго, галоўная прычына стварэння GRAI ў тым, што музыка застаецца адной з апошніх буйных спажывецкіх катэгорый, якая так і не стала «creator-first». Лесун таксама стаяў за праектам для стварэння відэа Vochi, які быў прададзены Pinterest. Цяпер ён разам з большай часткай каманды GRAI працуе з Польшчы.
Сваю аўдыторыю кампанія бачыць у зумераў і прадстаўнікоў пакалення Альфа, якія адкрываюць для сябе музыку праз культуру — сяброў, фандомы і кароткі кантэнт накшталт тыктокаў. Гэтыя людзі не хочуць быць музыкамі ці прадзюсарамі, але ўсё роўна хочуць неяк удзельнічаць. Лесун кажа, што сёння музычнае спажыванне ў цэлым зламанае: трэкі складана знаходзіць, слухаеш пасіўна, і вакол гэтага няма ніякага сацыяльнага вымярэння. Гэтую праблему і спрабуе вырашыць GRAI.
Тут распрацавалі ўласны граф густаў і ўзаемадзеянняў, а таксама ўласную інфраструктуру. Кампанія будуе інструменты і аўдыясістэмы, якія дазваляюць трансфармаваць трэкі, захоўваючы ідэнтычнасць арыгінала. Першыя дадаткі кампанія разглядае як спосаб атрымаць зваротную сувязь ад карыстальнікаў, у тым ліку негатыўную, каб зразумець, што працуе, а што не.
«Мы не хочам заліваць стрымінгавыя сервісы новым ШІ-слопам. Нас цікавіць менавіта ўзаемадзеянне», — тлумачыць Лесун. Ён не падзяляе апасенняў, што ШІ заб’е артыстаў і лэйблы. Наадварот, у GRAI лічаць, што ШІ можа адкрыць новыя спосабы ўзаемадзеяння з музыкай далёка за межамі генерацыі трэкаў. А калі падобная актыўнасць увойдзе ў звычку, гэта дапаможа людзям адкрываць новых артыстаў і трэкі за межамі буйных платформаў — Reels, TikTok ці YouTube.
Мадыфікаваныя трэкі могуць стаць новай крыніцай роялці. Прычым кампанія з пачатку вядзе перамовы з лэйбламі напрамую.
«Мы хочам пабудаваць сістэму, у якой у артыстаў будзе магчымасць самім вырашаць, удзельнічаць ці не. Гэта базавае перакананне GRAI: спачатку спытай у ўладальнікаў — потым інтэгруй», — адзначыў Лесун. Ці ёсць у кампаніі ўжо заключаныя пагадненні і з кім менавіта, ён казаць адмовіўся.
Релоцировались? Теперь вы можете комментировать без верификации аккаунта.