Беларускія хірургі МНПЦ хірургіі, транспланталогіі і гематалогіі разам з кітайскімі калегамі правялі дыстанцыйную аперацыю на печані пацыента ў Кітаі. Пра гэта распавёў Камітэт па ахове здароўя Мінгарвыканкама.
Беларускія хірургі МНПЦ хірургіі, транспланталогіі і гематалогіі разам з кітайскімі калегамі правялі дыстанцыйную аперацыю на печані пацыента ў Кітаі. Пра гэта распавёў Камітэт па ахове здароўя Мінгарвыканкама.
Пацыент знаходзіўся на аперацыйным стале ў шпіталі Медычнага каледжа Чжэцзянскага ўніверсітэта. Аперацыю правялі з дапамогай рабатызаванага комплексу Medbot, які ўжо выкарыстоўваюць у шэрагу вядучых шпіталяў па анкаўролагіі і анкахірургіі. Каб авалодаць ім, некалькі беларускіх брыгад прайшлі стажыроўку ў Кітаі.
«Гэтае ўмяшанне — першы крок да дыстанцыйнай хірургіі ў рэальным часе. Пацыент знаходзіцца ў Кітайскай Народнай Рэспубліцы, а аперацыйная брыгада — у Беларусі», — адзначыў дырэктар МНПЦ і акадэмік НАН Алег Румо, дадаткова падкрэсліўшы, што Беларусь уваходзіць у топ высокатэхналагічных дзяржаваў, здольных выконваць падобныя праекты.
Абсталяванне выраблена ў Кітаі. Паводле паведамлення, падобныя аперацыі патрабуюць развітай тэлекомунікацыйнай інфраструктуры для стабільнай і якаснай перадачы дадзеных у рэжыме рэальнага часу.
Паводле Румо, падобныя аперацыі плануюць распачаць і ў Беларусі: «Хірургі будуць знаходзіцца ў нашым цэнтры, а аператыўныя ўмяшанні — у рэгіёнах, дзе ўсталююць падобныя робаты». У бліжэйшы час запланавана правядзенне сумеснай аперацыі са спецыялістамі Мінскай абласной клінічнай бальніцы.
«Аперацыйны хірург можа працаваць у Мінску, а каманда падтрымкі — у шпіталі Мінскай вобласці, Гродна ці Гомля. Такім чынам, маючы кваліфікаваных спецыялістаў на месцы, мы можам дыстанцыйна навучаць дактароў у рэгіёнах і выконваць складанейшыя аперацыі», — дадаў Румо. Каманда на месцы можа ўмяшацца ў пазаштатных сітуацыях, але кантроль над ходам і якасцю аперацыі, а таксама выкананне ключавых этапаў будзе ажыццяўляцца ў Мінску на базе цэнтра.
Релоцировались? Теперь вы можете комментировать без верификации аккаунта.