Аддзел навін 28 лістапада 2024, 18:37

Alibaba выпусціла оўпэнсорсную «думаючую» мадэль — канкурэнта o1 ад OpenAI

Alibaba паказала АІ-мадэль з адкрытым зыходным кодам QwQ-32В-Preview, здольную разважаць, піша TechCrunch.

Мадэль налічвае 32,5 млрд параметраў і можа апрацоўваць запыты даўжынёй прыкладна да 32 тысяч слоў. QwQ-32В-Preview умее вырашаць лагічныя і матэматычныя заданні, але распрацоўшчыкі прызнаюць, што яна не ідэальная — напрыклад, яна можа раптам пераскокваць з адной мовы на іншую, зацыклівацца і недастаткова добра спраўляцца з заданнямі, якія маюць на ўвазе разважанне на аснове здаровага сэнсу.

Alibaba сцвярджае, што яе распрацоўка пераўзыходзіць o1-preview і o1-mini — дзве «думаючыя» мадэлі, якія на цяперашні час выпусціла OpenAI — на двух бэнчмарках. Гэта AIME, які выкарыстоўваецца для вымярэння прадукцыйнасці мадэляў пры дапамозе іншых АІ-мадэляў, і MATH, які змяшчае тэкставыя матэматычныя задачы.

Мадэль распаўсюджваецца па ліцэнзіі Apache 2.0 і можа выкарыстоўвацца ў камерцыйных мэтах. Яна даступная для працы і спампоўкі на платформе АІ-распрацоўкі Hugging Face. Распрацоўшчыкі выклалі толькі частку кампанентаў QwQ-32В-Preview, што не дазволіць цалкам узнавіць яе і даведацца, як яна ўладкаваная знутры.

Як адзначае выданне, мадэлі кітайскага паходжання праходзяць праверку мясцовых рэгулятараў — іх адказы павінны адпавядаць «ключавым каштоўнасцям сацыялізму». Многія кітайскія мадэлі адмаўляюцца адказваць на пытанні, якія могуць выклікаць гнеў уладаў — напрыклад, на тэму рэжыму Сі Цзіньпіна.