Аддзел навін 4 кастрычніка 2024, 15:58

OpenAI паказала новы інтэрфейс ChatGPT пад назвай Canvas, прызначаны для працы з тэкстам і кодам, піша TechCrunch.

Распрацоўшчыкі адзначаюць, што ён натуральнейшы для працы з ChatGPT, просты і падыходзіць для мноства задач. Проста ў ім можна генераваць тэкст і код, а таксама вылучаць фрагменты, якія мае выправіць АІ.

Новы інтэрфейс аўтаматычна адкрываецца ў новым акне побач са звычайным дыялогавым акном, калі мадэль палічыць, што задача для гэтага падыходзіць. Напрыклад, можна папрасіць ChatGPT згенераваць імэйл, які адкрыецца ў новым інтэрфейсе. Тут можна будзе змяніць даўжыню тэксту, прапанаваць праўкі (напрыклад, зрабіць тэкст прыязнейшым або дадаць эмодзі) або папрасіць перапісаць яго на іншай мове.

Пакуль інструмент на стадыі ранняй бэта-версіі. Першымі доступ да яго атрымалі ўладальнікі падпісак ChatGPT Plus і Team, а на наступным тыдні апрабаваць яго змогуць карыстальнікі Enterprise і Edu. Пасля выхаду з бэты ён будзе даступны і бясплатным юзерам.