Аддзел навін 29 лістапада 2024, 13:50

На таргах 29 лістапада долар патаннеў упершыню амаль за тры тыдні

Курс долара па выніках таргоў на Беларускай валютна-фондавай біржы 29 лістапада склаў 3,5701.

У параўнанні з папярэднім днём долар патаннеў на 0,7%.

Курс еўра па выніках таргоў склаў 3,7950 (-1,5%).

Долар зменшыўся ў цане ўпершыню амаль за тры тыдні. Апошні раз курс долара зніжаўся 11 лістапада. У апошнюю дэкаду месяца курс амерыканскай валюты, наадварот, рэзка паскорыўся. Калі за першыя 20 дзён лістапада долар падаражэў на 2,3%, то за апошнія 10 дзён — больш чым на 5%.

У цэлым ад пачатку лістапада долар падаражэў амаль на 8%, а ад пачатку года — амаль на 12,5%. Еўра ад пачатку лістапада падаражэў на 5,3%, ад пачатку года — на 7,3%.

Паводле слоў экспертаў, на дынаміцы курса беларускага рубля да долара адбіваецца ўплыў вонкавых фактараў — перш за ўсё, расійскага валютнага рынку.

Беларуская эканоміка цесна злучаная з расійскай эканомікай. Акрамя таго, расійскі рубель у структуры кошыка валют займае найбольшую долю. У гэтай сувязі ваганні расійскага рубля да асноўных валют адбіваюцца на дынаміцы курса беларускага рубля да долара і еўра.

— Захоўваецца (ад 2022 года) вельмі высокая нявызначанасць: у любы момант могуць узнікнуць перадумовы для значнага абясцэнення беларускай валюты, — адзначаў раней старшы навуковы супрацоўнік даследчага цэнтра BEROC Зміцер Крук.

Проста цяпер дынаміку дыктуе расійскі рубель. На кароткім/сярэднім адрэзку верагодны сцэнар адкату да курса каля 95 расійскіх рублёў за долар і дыяпазону 95-100 RUB.

Для BYN гэта азначае стабілізацыю курса адносна USD і некаторае абясцэненне да RUB (адкат да ўзроўню каля 3,50 RUB/BYN).

Паступовае пагаршэнне стану гандлю, рэалізацыя назапашанага інфляцыйнага навеса і зніжэнне продажаў валюты насельніцтвам будуць на працягу 2025 года штурхаць BYN да абясцэнення прапарцыйна інфляцыі (7-8%).

Варта памятаць, што ўмяшанне любых неэканамічныя фактараў або ўплыў глабальных шокаў могуць істотна змяніць сітуацыю.