Аддзел навін 18 ліпеня 2024, 14:50

Дзірка ў PHP выкарыстоўваецца для распаўсюджвання шкоднікаў і правядзення DDoS-нападаў

Даследчыкі кампаніі Akamai папярэдзілі пра свежую ўразлівасць у PHP, праз якую мноства зламыснікаў распаўсюджваюць малвары і арганізуюць DDoS-атакі.

Пакінуць каментарый

Даследчыкі кампаніі Akamai папярэдзілі пра свежую ўразлівасць у PHP, праз якую мноства зламыснікаў распаўсюджваюць малвары і арганізуюць DDoS-атакі.

RCE-ўразлівасць CVE-2024-4577 (9,8 бала па шкале CVSS) была знойдзеная на пачатку чэрвеня. Яна дазваляе аддалена выконваць шкодныя каманды ў Windows-сістэмах. Праблема пагаршаецца пры выкарыстанні лакалізацый, якія больш успрымальныя да гэтага багу, уключаючы кітайскую і японскую.

«CVE-2024-4577 дазваляе зламысніку ўцячы з каманднага радка і перадаць аргументы для інтэрпрэтацыі непасрэдна PHP. Сама ўразлівасць звязаная з тым, як сімвалы Юнікода пераўтворацца ў ASCII», — пішуць даследчыкі.

Першыя спробы эксплуатацыі багу на сваіх honeypot-серверах яны зафіксавалі на працягу 24 гадзін пасля таго, як аб праблеме стала вядома шырокай грамадскасці. У прыватнасці, былі заўважаныя эксплойты, прызначаныя для распаўсюджвання траяна аддаленага доступу Gh0st RAT, крыптавалютных майнераў RedTail і XMRig, а таксама DDoS-батнэту Muhstik.

Раней пра пачатак эксплуатацыі CVE-2024-4577 паведамлялі спецыялісты кампаніі Imperva. Паводле іх даных, баг пачалі ўжываць удзельнікі вымагальніцкай групоўкі TellYouThePass для распаўсюджвання .NET-варыянту свайго шыфравальшчыка.