Джуліян Асанж заключыў угоду з ЗША і выйшаў на волю

У Wikileaks заявілі, што Асанж вернецца ў Аўстралію да сям'і. Паводле даных Associated Press, з турмы ён накіраваўся ў аэрапорт і сеў на самалёт. Затым самалёт прызямліўся ў Бангкоку для дазапраўкі, канчатковая мэта падарожжа — адная з тэрыторый ЗША ў Ціхім акіяне, Сайпан.

Асанжа вызвалілі пасля таго, як ён заключыў угоду з Міністэрствам юстыцыі ЗША. Яно дамагалася яго экстрадыцыі з Вялікабрытаніі. Паводле даных The New York Times, у абмен на вызваленне Асанж пагадзіўся прызнаць сябе вінаватым па адным з 17 пунктаў абвінавачвання ў незаконным атрыманні і публікацыі сакрэтных даных.

Паводле матэрыялаў справы, Асанж паўстане перад судом у Сайпане. Чакаецца, што Асанжа прысудзяць да пяці гадоў пазбаўлення волі. Тэрмін у брытанскай турме залічаць за час пакарання. Па завяршэнні разбору Асанж можа адправіцца ў Аўстралію.

У сукупнасці па ўсіх пунктах абвінавачвання яму пагражае да 175 гадоў турмы. Ад 2012 года сем гадоў Асанж хаваўся ў пасольстве Эквадора ў Лондане. Эквадор даў яму статус бежанца на фоне абвінавачванняў у сексуалізаваным гвалце ў Швецыі. Пазней Эквадор даў яму грамадзянства, а затым пазбавіў і грамадзянства, і статусу бежанца. Затым яго арыштавалі ў Лондане на запыт ЗША.