Николай Чикишев 6 чэрвеня 2023, 14:03

Еўрасаюз хоча абавязаць кампаніі пазначаць кантэнт, створаны АІ

Еўракамісія лічыць, што ўвесь кантэнт, створаны ў інтэрнэце пры дапамозе штучнага інтэлекту, неабходна маркіраваць.

Віцэ-прэзідэнт Еўракамісіі ў пытаннях каштоўнасцей і транспарэнтнасці Вера Юрава і камісар па ўнутраным рынку Цьеры Брэтон сустрэліся з прадстаўнікамі больш як 40 кампаній, якія падпісалі добраахвотны кодэкс Еўрасаюза па барацьбе з дэзынфармацыяй. Сярод гэтых кампаній TikTok, Microsoft і Meta. Twitter не стаў падпісваць кодэкс.

«Мы хочам, каб платформы стварылі такую маркіроўку, якая б дазваляла звычайнаму, самаму няўважліваму карыстальніку адразу бачыць, што гэта зроблена робатам», — заявіла Юрава. На яе думку, кампаніі мусяць распрацаваць тэхналогіі ідэнтыфікацыі прадукцыі нейрасеткі і маркіраваць на яе аснове кантэнт.

Таксама Еўракамісія заклікае кампаніі, якія займаюцца развіццём штучнага інтэлекту, ствараць інструменты, якія дазволяць адрозніваць кантэнт, створаны чалавекам, ад створанага АІ. Кампаніі, якія інтэгруюць АІ у свае сэрвісы, мусяць «прадугледзець неабходныя меры бяспекі, каб гэтыя сэрвісы не маглі выкарыстоўвацца зламыснікамі для стварэння дэзынфармацыі».