Fin.do не зможа рабіць пераводы на некаторыя карты беларускіх банкаў

Платформа для P2P-пераводаў Fin.do анансавала будучыя абмежаванні для грашовых пераводаў у Беларусь.

Ад 1 красавіка 2024 года сэрвіс больш не будзе падтрымліваць пераводы на карты Mastercard некаторых беларускіх банкаў:

— Прыёрбанка (карты з нумарамі 5489 52xx xxxx xxxx; 5366 00xx xxxx xxxx; 5326 58xx xxxx xxxx);

— Альфа-Банка (карты з нумарамі 5208 13xx xxxx xxxx; 5475 32xx xxxx xxxx; 5446 50xx xxxx xxxx; 5392 14xx xxxx xxxx; 5442 06xx xxxx xxxx; 5370 00xx xxxx xxxx);

— БелВЭБа (5277 97xx xxxx xxxx);

— Белгазпрамбанка (5265 52xx xxxx xxxx).

У выпадку з Прыёрам, Альфай і БелВЭБам будуць працаваць карты Visa. У выпадку з Белгазпрамбанкам карты Visa падтрымлівацца таксама не будуць.

Якія карты ў РБ будуць прымаць пераводы

Тым, хто сутыкнецца з абмежаваннямі, Fin.do раіць перавыпусціць карту, змяніўшы банк або плацежную сістэму. Вось якія банкі застануцца «ў справе» з картамі абедзвюх сістэм — і Visa, і Mastercard:

— Беларусбанк;

— Белаграпрамбанк;

— МТБ;

— БСБ;

— Парытэтбанк.

А вось у гэтых банкаў перавод праз Fin.do можна будзе атрымаць толькі на Visa:

— Прыёрбанк;

— Альфа-Банк;

— Тэхнабанк;

— Цэптар Банк;

— БТА;

— БелВЭБ;

— «Рашэнне»

— БНБ.

Пераводы з карт Беларусі

Адпраўка грошай з Беларусі застанецца даступнай з усіх карт. Аднак ад 1 красавіка стане немагчымая адпраўка пераводаў у валюце BYN.

Каб адправіць грошы з карты ў BYN, трэба будзе выбраць іншую валюту — долары ЗША, еўра, фунты стэрлінгаў і г. д. Пры гэтым адбудзецца аўтаматычная канвертацыя.

Атрыманне грашовых пераводаў у BYN па-ранейшаму будзе даступнае.