Николай Чикишев 17 красавіка 2024, 16:50

Fortune: TikTok не абараняла даных амерыканцаў і працягвала зліваць іх ByteDance

Пад ціскам амерыканскіх заканадаўцаў сацсетка запусціла праграму Project Texas, якая мелася паказаць празрыстасць выкарыстання карыстальніцкіх звестак амерыканцаў.

1 каментарый

Fortune: TikTok не абараняла даных амерыканцаў і працягвала зліваць іх ByteDance

Пад ціскам амерыканскіх заканадаўцаў сацсетка запусціла праграму Project Texas, якая мелася паказаць празрыстасць выкарыстання карыстальніцкіх звестак амерыканцаў.

Паводле звестак Fortune, Project Texas прадугледжвае перадачу ўсіх звестак амерыканскіх карыстальнікаў сацсеткі ў воблачную інфраструктуру Oracle. Хоць назва праекта адсылае да штаб-кватэры Oracle у тэхаскім Осціне, насамрэч ніводны з воблачных сэрвісаў кампаніі не размяшчаецца ў самім штаце. Паводле ўмоў праграмы, даныя амерыканцаў не павінны пакідаць ЗША, а ў супрацоўнікаў кампаніі-ўладальніка ByteDance не павінна быць да іх доступу.

Былы супрацоўнік TikTok сцвярджае, што абарона даных у рэчаіснасці не была такой эфектыўнай. Фармальна работнікаў амерыканскага філіяла перавялі пад кіраўніцтва менеджменту ў Сіэтле, але насамрэч яны працягвалі даваць справаздачу кіраўніцтву ў Кітаі. Кожныя два тыдні ён адпраўляў у пекінскае падраздзяленне ByteDance дакументацыю з асабістымі данымі карыстальнікаў з ЗША. Гэта патрабавалася для працы над алгарытмам.

Іншая былая супрацоўніца Кэці Пурыс заявіла, што TikTok заўсёды быў залежны ад ByteDance. Яна ўзначальвала аддзел бізнэс-маркетынгу і падала на кампанію ў суд за дыскрымінацыю. На думку Пурыс, яе звольнілі, бо ў Пекіне яе палічылі недастаткова сціплай. У пазове гаворыцца, што ў 2020 годзе кіраўніцтва ўзмацніла кантроль над сацсеткай, і раз на два месяцы праходзілі сустрэчы з найвышэйшым кіраўніцтвам ByteDance.

Тым не менш знайшліся і тыя былыя работнікі сацсеткі, якія назвалі сувязі з кітайскай кампаніяй перабольшанымі. Напрыклад, адзін з былых менеджараў падчас слуханняў у Кангрэсе ЗША заявіў, што Project Texas і яго еўрапейскі аналаг Project Clover мелі вялікае значэнне для абароны персанальных даных амерыканцаў і еўрапейцаў. А метады збору даных TikTok практычна не адрозніваюцца ад метадаў іншых тэхналагічных кампаній.