Генеральны дырэктар тайванскай кампаніі Phison Electronics Пу Кхейн-Сен заявіў, што дэфіцыт памяці, звязаны з ростам попыту на ШІ-рашэнні, можа сур’ёзна паўплываць на рынак спажывецкай электронікі. Інтэрв’ю з ім пераказаў PC Gamer.
Паводле яго слоў, ужо сёлета частка вытворцаў спажывецкай электронікі можа збанкрутаваць або сысці з асобных прадуктовых лінеек з-за недахопу памяці. Выпуск смартфонаў можа знізіцца на 200-250 млн прылад, і можа значна паменшыцца вытворчасць ПК і тэлевізараў.
Пу Кхейн-Сен таксама адзначыў магчымы ўплыў росту паставак ШІ-абсталявання. Па яго ацэнцы, калі будучыя паскаральнікі Nvidia (архітэктура Rubin) будуць выпускацца дзясяткамі мільёнаў адзінак, то спажыванне памяці можа рэзка павялічыцца: адзін такі паскаральнік можа патрабаваць больш за 20 Тб SSD-сховішча. У такім выпадку сукупны попыт з боку ШІ-сектара можа заняць значную долю сусветнай вытворчасці NAND-памяці.
Асобна ён указаў на змены ва ўмовах паставак памяці: вытворцы могуць патрабаваць перадаплату на тры гады наперад, чаго ў індустрыі ніколі не было. Пу Кхейн-Сен кажа, што па ўнутраных ацэнках галіны, дэфіцыт можа захавацца да канца дзесяцігоддзя або даўжэй.
Аналітыкі таксама адзначаюць, што нарошчванне вытворчасці памяці патрабуе часу: ад абвяшчэння інвестыцый да выхаду на поўную магутнасць праходзіць не менш за два гады. Найбуйнейшыя вытворцы, такія як Samsung, Micron, SK Hynix, Kioxia і іншыя, ужо інвестуюць у пашырэнне магутнасцяў, аднак у кароткатэрміновай перспектыве гэта не цалкам закрывае разрыў паміж попытам і прапановай.
Phison спецыялізуецца на распрацоўцы кантролераў для NAND-памяці і рашэнняў для захоўвання дадзеных (уключаючы SSD). Яна не вырабляе памяць сама, але шчыльна працуе з найбуйнейшымі пастаўшчыкамі і OEM-вытворцамі электронікі, таму яе ацэнкі адлюстроўваюць сітуацыю ў ланцугу паставак.
Рэлацыраваліся? Цяпер вы можаце каментаваць без верыфікацыі акаўнта.