Аддзел навін 5 верасня 2023, 16:47

Гендырэктар OpenAI стаў першым уладальнікам «залатой візы»

Інданезія выдала першую «залатую» візу для багатых замежнікаў — яе атрымаў кіраўнік OpenAI Сэм Альтман, піша CNBC. Праграма прыцягнення замежных інвестыцый была запушчаная тыдзень таму.

Пакінуць каментарый

Гендырэктар OpenAI стаў першым уладальнікам «залатой візы»

Інданезія выдала першую «залатую» візу для багатых замежнікаў — яе атрымаў кіраўнік OpenAI Сэм Альтман, піша CNBC. Праграма прыцягнення замежных інвестыцый была запушчаная тыдзень таму.

«Ёсць некалькі катэгорый залатых віз, акрамя тых, якія заснаваныя на інвестыцыях/капітальных інвестыцыях. Адна з іх выдаецца асобам з міжнароднай рэпутацыяй, якія могуць прынесці карысць Інданезіі», — адзначыў кіраўнік іміграцыйнай службы краіны Сілмі Карым.

Ён дадаў, што спадзяецца, што Альтман дапаможа стымуляваць развіццё і выкарыстанне штучнага інтэлекту ў Інданезіі.

Віза амерыканскага бізнэсоўца будзе дзейнічаць на працягу 10 гадоў. Яна прадугледжвае прыярытэт пры праходжанні праверкі ў мясцовых аэрапортах, даўжэйшае знаходжанне ў краіне, а таксама спрошчаны парадак уезду і выезду.

Альтман наведваў Інданэзію сёлета ў рамках вялікай паездкі па краінах свету, якая ўключала Азію. Прадпрымальнік таксама пабываў у Пекіне, Токіа, Сеуле і Сінгапуры.

Як удакладняе Jakarta Post, прадугледжана некалькі тыпаў «залатых» інвестыцыйных віз — 5- і 10-гадовая, для індывідуальных інвестараў і карпаратыўных. Іх кошт вар'іруецца ад $2,5 млн да $50 млн. Гэтую суму інвестар мае ўкласці ў бізнэс унутры краіны — адкрыць сваю кампанію або купіць мясцовую, якая ўжо працуе.