Google будзе выдаляць акаўнты, якія задоўга былі неактыўныя

Паводле ранейшай палітыкі, Google магла выдаляць даныя, якія захоўваюцца ў акаўнтах, неактыўных два гады. Цяпер гаворка вядзецца пра поўнае выдаленне ўліковых запісаў з усёй інфармацыяй.

Новыя правілы набудуць моц не раней за гэты снежань. Перш ніж выдаляць, кампанія будзе слаць карыстальніку апавяшчэння на асноўны і рэзервовы адрасы. Новаўвядзенні не тычацца бізнэс-акаўнтаў і акаўнтаў навучальных устаноў.

Каб падтрымліваць актыўнасць акаўнта, дастаткова чытаць або адпраўляць электронныя паведамленні, карыстацца Google Дыскам або пашукавіком, глядзець відэа на YouTube, пампаваць праграмы ў Google Play Store або карыстацца аўтарызацыяй праз Google-акаўнт у іншай праграме або сэрвісе.

Такую меру кампанія тлумачыць тым, што неактыўныя акаўнты ўразлівейшыя, і жаданнем абараніць іх уладальнікаў ад кіберпагроз, такіх як фішынгавыя атакі, узлом, крадзеж асобы і спам.