Дзяржмедыя паведамляюць пра падзенне ракеты на поўдні Беларусі. Што вядома?

БЕЛТА паведамляе, што ракета ўпала ў прамежку ад 10.00 да 11.00. На даручэнне Аляксандра Лукашэнкі група спецыялістаў з ліку супрацоўнікаў Следчага камітэта і Міністэрства абароны вызначае прычыны падзення.

БЕЛТА піша пра дзве версіі падзеі: 

1. Залёт ракеты на тэрыторыю Беларусі, аналагічны нядаўняму інцыдэнту ў Польшчы, калі ракета паляцела не ў той бок.
2. Ракета збітая ў выніку працы сістэм СПА Беларусі.

На фотаздымках, апублікаваных БЕЛТА, відаць аскепкі ракеты, якія ляжаць у полі. Крыніца фота — тэлеграм-канал «Беларускі сілавік». У гэтым канале ўдакладняецца месца, дзе меркавана ўпала ракета — Іванаўскі раён Брэсцкай вобласці (у іншых пабліках згадваецца вёска Гарбаха ў Іванаўскім раёне). «Беларускі сілавік» публікуе дадатковыя фатаграфіі ракеты з канала «ЖС Premium» (канал апісваецца як «Сталёвыя. Бацькавы. Твае»). Апошні спасылаецца на яшчэ адзін тэлеграм-канал — «Тры сястры». 

Усе тры каналы, мяркуючы з пастоў, падтрымліваюць уварванне Расіі ва Украіну.

Пазней БЕЛТА апублікавала відэа з месца меркаванага падзення ракеты.

Беларускія незалежныя медыя змаглі пагутарыць з жыхарамі горада Іванава Брэсцкай вобласці, побач з якім магла ўпасці ракета. Яны паведамляюць, што раніцай 29 снежня чулі моцны гук, падобны да выбуху.

Прэс-служба Міністэрства абароны Беларусі паведаміла, што «сёння каля 10 гадзін сіламі войскаў супрацьпаветранай абароны была паражоная паветраная мэта. У ходзе праверачных дзеяў папярэдне выяўлена, што абломкі належаць зенітнай кіраванай ракеце С-300, выпушчанай з тэрыторыі Украіны».