Выхад новых мадэляў для праграмавання GPT-5.3-Codex і Claude Opus 4.6 выклікаў у супольнасці распрацоўшчыкаў дыскусію пра тое, ці не набліжаецца традыцыйнае кадаванне да канца. Многія інжынеры заявілі, што фактычна спынілі пісаць код уручную.
Выхад новых мадэляў для праграмавання GPT-5.3-Codex і Claude Opus 4.6 выклікаў у супольнасці распрацоўшчыкаў дыскусію пра тое, ці не набліжаецца традыцыйнае кадаванне да канца. Многія інжынеры заявілі, што фактычна спынілі пісаць код уручную.
Шырокі рэзананс выклікала эсэ кіраўніка OthersideAI Мэта Шумера. Бізнесмен параўнаў бягучы момант у развіцці ШІ з пачаткам пандэміі: «Думаю, мы знаходзімся ў фазе „гэта падаецца перабольшваннем“ чагосьці значна, значна большага за каранавірус». Паводле яго словаў, разрыў паміж грамадскім успрыманнем і рэальным станам тэхналогій стаў «велізарным — і гэты разрыў небяспечны, бо перашкаджае людзям падрыхтавацца».
Шумер сцвярджае, што пералом адбыўся ў лютым гэтага года, калі OpenAI і Anthropic выпусцілі новыя мадэлі: «І тут нешта шчоўкнула. Я больш не патрэбны для фактычнай тэхнічнай працы ў сваёй прафесіі. Я апісваю, што хачу стварыць, звычайнай англійскай — і гэта проста з’яўляецца. Не чарнавік, які трэба правіць. Гатовы вынік. Зроблены добра, лепш, чым зрабіў бы я сам».
На ягоны погляд, праграмаванне стала першым полем, дзе адбыўся прарыў, бо «стварэнне ШІ патрабуе шмат кода. Калі ШІ можа пісаць гэты код, ён дапамагае будаваць наступную версію самога сябе». І гэты цыкл ужо запушчаны: «ШІ дапамог стварыць самога сябе», — нагадвае ён, цытуючы дакументацыю OpenAI.
Кажучы пра рынак працы, Шумер спасылаецца на ацэнкі кіраўнікоў галіны: «ШІ ліквідуе 50% пачатковых офісных пазіцый на працягу аднаго–пяці гадоў». Сам ён лічыць, што маштабныя змены могуць пачацца яшчэ хутчэй: «Калі ШІ разумнейшы за большасць PhD, вы сапраўды думаеце, што ён не зможа выконваць большасць офісных працаў?»
Тым, хто скептычна ставіцца да тэхналогій, Шумер адказвае прама: «Калі вы спрабавалі ШІ ў 2023 годзе і падумалі, што ён не ўражвае, вы мелі рацыю. Але гэта было два гады таму. У часе ШІ гэта старажытная гісторыя». Паводле яго словаў, цяперашнія мадэлі «непазнавальныя ў параўнанні з тым, што існавала нават шэсць месяцаў таму». «Мы прайшлі кропку, калі гэта проста цікавая размова за вячэрай пра будучыню. Будучыня ўжо тут. Яна проста яшчэ не пагрукала ў вашы дзверы. Але вось-вось пагрукае», — падсумаваў бізнесмен.
Аднак не ўсе падзяляюць гэты аптымізм. Прафесар Нью-Ёркскага ўніверсітэта Гэры Маркус назваў падобныя заявы «узброеным хайпам», указаўшы на адсутнасць даных, якія пацвярджаюць здольнасць ШІ без памылак ствараць складаныя праграмы. Эксперты адзначаюць, што праграмаванне прасцей аўтаматызаваць дзякуючы аўтатэстам і фармалізаваным працэсам, тады як у іншых сферах ведаў усё складаней.
Тым не менш для многіх інжынераў змены ўжо сталі штодзённасцю. Су-гендырэктар Spotify Густаў Сёдэрстрём заявіў, што лепшыя распрацоўшчыкі кампаніі «не напісалі ні аднаго радка коду са снежня». Па яго словах, з дапамогай Claude Code інжынеры могуць даручыць ШІ выправіць баг або дадаць функцыю прама праз Slack, а да прыходу ў офіс змены ўжо інтэграваныя ў прадакшн. У 2025 годзе кампанія выпусціла больш за 50 новых функцый, выкарыстоўваючы падобныя працэсы.
Унутры Anthropic залежнасць ад ШІ яшчэ вышэйшая. Кіраўнік Claude Code Барыс Чорны паведаміў, што не пісаў код больш за два месяцы. Паводле дадзеных кампаніі, ад 70% да 90% яе кода генеруецца ШІ. OpenAI заявіла, што GPT-5.3-Codex стала «першай мадэллю, якая сыграла ключавую ролю ў стварэнні самой сябе».
Пры гэтым частка распрацоўшчыкаў папярэджвае пра рызыкі. Дасведчаны інжынер Стыў Еге напісаў, што інструменты ШІ узмацняюць нагрузку на спецыялістаў. «З 10-кратным прыростам прадуктыўнасці, калі даць інжынеру Claude Code, яго паток працы будзе ствараць каштоўнасць дзевяці дадатковых інжынераў», — адзначыў ён. Але пры гэтым «стварэнне прадуктаў з ШІ патрабуе велізарнай чалавечай энергіі».
