Аддзел навін world 29 красавіка 2025, 15:17

IBM паабяцала інвеставаць $150 млрд у ЗША цягам пяці гадоў. Пры тым што зарабляе $6 млрд у год

У бліжэйшыя пяць гадоў IBM плануе інвеставаць у ЗША $150 млрд. Пра гэта кампанія паведаміла на сваім сайце.

У прыватнасці, больш за $30 млрд будзе накіравана на даследаванні і распрацоўкі ў галіне мэйнфрэймаў і квантавых камп’ютараў. Паводле слоў кампаніі, гэта будзе спрыяць развіццю эканомікі краіны і ўмацуе яе сусветнае лідарства ў сферы вылічэнняў. Таксама IBM паабяцала працягваць распрацоўку і зборку квантавых камп’ютараў на тэрыторыі ЗША.

За папярэднія пяць гадоў сусветныя выдаткі IBM на R&D склалі прыблізна $33,6 млрд, а сукупныя аперацыйныя выдаткі за той жа перыяд — $141,8 млрд.

Дзе кампанія плануе ўзяць грошы, у прэс-рэлізе не ўдакладняецца. Яе даход за 2024 фінансавы год склаў $62,8 млрд (+1,4% да 2023 года), а чысты прыбытак — $6,02 млрд (-20%). Каціроўкі IBM на анонс практычна не адрэагавалі.

Акрамя яе пра шматмільярдныя інвестыцыі ў тэхналагічны сектар краіны пасля перавыбрання Дональда Трампа на пасаду прэзідэнта абвясцілі Apple і шэраг іншых кампаній.