Замежныя інвестыцыі ў ІКТ упалі да мінімуму за 5 гадоў

За мінулы год кампаніі сектара «інфармацыя і сувязь» атрымалі 586,3 млн долараў замежных інвестыцый. У параўнанні з 2023 годам аб’ём прыцягнутых інвестыцый скараціўся на 12%, або на 85 млн долараў. 

Прыток замежных інвестыцый у ІКТ падае трэці год запар — пасля пікавага 2021 года, калі кампаніі сектара прыцягнулі амаль 850 млн долараў. Пры гэтым упершыню за апошнія 5 гадоў сума замежных інвестыцый была ніжэйшай за 600 млн долараў. 

Тым не менш сярод асноўных відаў дзейнасці ІКТ па-ранейшаму ўваходзіць у топ-3 па аб’ёме прыцягнутых замежных інвестыцый.

Белстат не апублікаваў інфармацыі па замежных інвестыцыях непасрэдна ў ІТ-кампаніі за мінулы год. Але мяркуючы з раней апублікаваных даных, сітуацыя аналагічная. У прыватнасці, у 2023 годзе агульны аб’ём замежных інвестыцый у ІТ склаў 233,6 мільёна долараў. Інвестыцыі ўпалі фактычна да ўзроўню 2018 года.