Internet Archive прайграў апеляцыю ў справе супраць выдаўцоў

Апеляцыйны суд пастанавіў, што праца лічбавай бібліятэкі «дазволіць шырокамаштабнае капіяванне, якое пазбавіць аўтараў кампенсацыі і знізіць стымул для стварэння новых твораў».

У 2020 годзе чатыры буйныя выдавецтвы — Hachette, Penguin Random House, Wiley і HaprerCollins — падалі ў суд на Internet Archive. Пазоўнікі абвінавацілі бібліятэку ў «наўмысным лічбавым пірацтве ў прамысловых маштабах».

Выдаўцы дамагліся выдалення 500 тысяч кніг з вольнага доступу ў анлайн-бібліятэцы. Таксама суд паказаў, што арганізацыя мае камерцыйную выгаду ад ахвяраванняў. Анлайн-бібліятэка была не згодная з такім рашэннем і заявіла, што сродкі накіроўваюцца на фінансаванне самога праекта.

Internet Archive даўно прапаноўвае карыстальнікам лічбавыя копіі кніг па праграме Open Library. Арганізацыя настойвае, што працуе па тым жа прынцыпе, што і звычайныя бібліятэкі, то-бок дае лічбавую копію на час чытання. Праект называе гэта добрасумленным выкарыстаннем аб’ектаў аўтарскага права.

Хоць Апеляцыйны суд прызнаў перавагі лічбавых бібліятэк, у канчатковым рашэнні ён стаў на бок выдаўцоў. У мінулым годзе федэральны суд пастанавіў, што Internet Archive не мае права сканаваць і перадаваць лічбавыя копіі карыстальнікам, як бібліятэка.

«Мы расчараваныя сённяшнім рашэннем <… > мы разгледзім рашэнне суда і працягнем абараняць правы бібліятэк валодаць, перадаваць і захоўваць кнігі», — заявіў Крыс Фрыланд, дырэктар па бібліятэчных паслугамі Internet Archive.