iPhone 16 атрымае новую функцыю, вельмі падобную да скандальнай функцыі Windows 11

«Калі вам трэба хутка знайсці важную інфармацыю, але вы не памятаеце, дзе яна захоўваецца, Siri, выкарыстоўваючы ваш асабісты семантычны індэкс, хутка знойдзе патрэбную інфармацыю», — заявіў на прэзентацыі старшы віцэ-прэзідэнт Apple Грэг Джозвіяк.

Карыстальнікі адразу ж звярнулі ўвагу, што функцыя Apple вельмі падобная апісаннем да скандальнай функцыі Microsoft пад назвай Recall. Windows Recall — гэта функцыя на базе АІ у Windows 11, якая робіць здымкі галоўнага экрана і дазваляе ў спецыяльнай базе знайсці патрэбны момант працы ПК у мінулым.

Крытыкі звярнулі ўвагу, што канфідэнцыйныя даныя карыстальніка ў гэтай базе знаходзяцца пад пагрозай, паколькі захоўваюцца ў незашыфраваным выглядзе. Хоць Microsoft запэўніла карыстальнікаў, што даныя будуць захоўвацца толькі лакальна, аднак адклала рэліз функцыі.

Apple падкрэсліла, што ўся інфармацыя таксама будзе захоўвацца толькі на прыладзе і не будзе адпраўляцца на серверы кампаніі. Пакуль незразумела, ці ідзе гаворка пра шыфраванне даных, паколькі ў выпадку несанкцыянаванага доступу зламыснікі могуць лёгка скапіяваць усю інфармацыю.