Сонечныя панэлі на дахах дамоў мяняюць клімат у гарадах — дні становяцца цяплейшымі, а ночы халаднейшымі

Прапанаваны навукоўцамі інструмент для разлікаў выкарыстоўвае найноўшую мадэль даследаванняў і прагназавання надвор’я, якая інтэгруе энергетычную мадэль будынка і параметрызацыю эфекту будынка. Мадэль была правераная на дзесяці аб’ектах у індыйскай Калькуце з выкарыстаннем эксперыментальна атрыманых даных.

Было праведзена 5 эксперыментаў на працягу аднаго самага гарачага месяца. Адбівальная здольнасць голага даху (альбеда) прымалася за значэнне 0,15. У ходзе вопыту даследаваліся варыянты з пакрыццём гарадскіх дахаў сонечнымі ўстаноўкамі на ўзроўні 0,25, 0,50, 0,75 і 1,0 плошчы. Альбеда для панэляў, эфектыўнасць пераўтварэння і выпраменьвальную здольнасць устанавілі на адзнаках 0,11, 0,19 і 0,95 адпаведна.

Методыка была пратэсціраваная спачатку ў Калькуце, а затым пацверджаная ў Сіднэі (Аўстралія), Осціне (ЗША), Афінах (Грэцыя) і Брусэлі (Бельгія), каб гарантаваць, што вынікі не абмяжоўваюцца канкрэтнай кліматычнай зонай. Высветлілася, што размяшчэнне на дахах дамоў у гарадах сонечных панэляў павышае дзённую тэмпературу на ўзроўні зямлі на 1,1-1,9°C. Таксама панэлі на дахах спрыяюць таму, што ноччу тэмпература паветра на ўзроўні зямлі становіцца крыху ніжэйшай — на 0,3-0,8°C.

Што самае істотнае, панэлі на дахах інтэнсіфікуюць перамешванне паветра на гарадскіх вуліцах, што падымае так званы планетарны памежны пласт — самую нізкую частку атмасферы, на якую непасрэдна ўплывае паверхню зямлі — да вышыні 615,6 м. Гэта зніжае ўзровень забруджвання паветра на ўзроўні зямлі, што можна лічыць дабром для гарадоў і іх жыхароў.