Як будуць выглядаць чужыя маркетплэйсы ў iOS: першыя скрыны

Першы чужы маркетплэйс — платформа Mobivention, якая дазваляе кампаніям распаўсюджваць уласныя праграмы сярод супрацоўнікаў. Ужо анансаваныя крамы Epic Games, MacPaw Setapp і AltStore. Апошняя была запушчаная ў 2019 годзе як альтэрнатыва App Store, цяпер афіцыйная версія крамы знаходзіцца на ўхваленні Apple.

Apple крытыкавалі за непразрыстасць і дарагоўлю новых правілаў для іншых маркетплэйсаў. За ўсталёўку новых праграм звыш 1 мільёна загрузак распрацоўшчык мае плаціць «асноўны тэхналагічны збор» у памеры 0,5 еўра. Гэты збор распаўсюджваецца і на самі крамы праграм. Напрыклад, Mobivention уключыла збор у цэны для сваіх кліентаў.

Іншая перашкода — гэта складанасць усталёўкі маркетплэйсаў. Для гэтага карыстальніку трэба праз браўзер націснуць на загрузку альтэрнатыўнай крамы. Затым з’явіцца апавяшчэнне, што налады гаджата не падтрымліваюць працу з пляцоўкамі гэтага распрацоўшчыка. Тады карыстальніку трэба дазволіць падтрымку іншай гандлёвай пляцоўкі ў наладах і загрузіць усталёвачны файл праз браўзер. Пры гэтым App Store запускаецца ў адзін дотык.

У AltStore даступныя дзве праграмы, распрацаваныя стваральнікамі пляцоўкі: гэта Delta — эмулятар класічных прыставак Nintendo, а таксама Clip — менеджар буфера абмену з пашыранымі магчымасцямі. Delta дазваляе загружаць файлы гульняў з iCloud або лакальнай тэчкі «Загрузкі» і нават падключаць вонкавыя кантролеры.

Clip працуе ў фонавым рэжыме, асобныя элементы можна выклікаць па неабходнасці. Apple абмяжоўвае магчымасці буфераў абмену з меркаванняў бяспекі, але распрацоўшчыкі Clip сцвярджаюць, што выкарыстоўваюць у працы стандартныя сродкі бяспекі iOS, а даныя захоўваюцца лакальна ў базе даных SQLite. Падпіску можна аформіць на Patreon за $1 на месяц.

Apple заяўляла, што праграмы на чужых пляцоўках могуць выявіцца менш бяспечнымі, чым софт у App Store. Тым не менш распрацоўшчыкам даводзіцца ўзгадняць з Apple рэалізацыю некаторых функцый у сваіх праграмах у альтэрнатыўных крамах. Эксперты лічаць, што чужыя маркетплэйсы будуць прывабнымі ў першую чаргу для вопытных карыстальнікаў і энтузіястаў, якія вырашаюць нейкія спецыфічныя праблемы або шукаюць тое, чаго няма ў App Store.