Кожны чацвёрты айцішнік меў фінансавыя цяжкасці ў 2024-м. Нашая анкета

Мы спыталі ў чытачоў, як прайшоў у іх 2024-ы. Адказалі 350 чалавек.

Амаль для паловы беларускіх айцішнікаў (незалежна ад краіны пражывання) год быў вельмі насычаным, у іх жыцці многае адбылося. Амаль чвэрць называе гэты год вельмі цяжкім, кожны пяты-шосты быў шчаслівы, а кожны дзясяты, наадварот, нешчаслівы. І менш за ўсё тых, хто лічыць 2024 год сярэдненькім.

Кожны чацвёрты знайшоў летась новых сяброў, або новую працу, або і тое, і другое разам. Кожны шосты даў рады хваробе. Кожны дванаццаты звольніўся з нялюбай працы, купіў жытло або знайшоў каханне (або ўсё разам). У трох адсоткаў айцішнікаў нарадзілася дзіця! Знайшліся, што праўда, і такія, у каго нічога добрага не адбылося (або яны проста так думаюць). 

А вось што адказвалі тыя, чыё добрае не ўпісаліся ў прапанаваныя варыянты (спойлер: атрымлівалі павышэнне на працы, падарожнічалі, стваралі сем'і, рабілі рамонт, заводзілі жывёл і г. д.):

— Звазіў сям’ю і бацькоў у адпачынак;

— Пачаў вывучаць новую мову праграмавання з практыкай у прадакшане;

— Замяніў пашпарт;

— Выйшла замуж, дзеці паступілі ў Польшчу, муж знайшоў працу ў Польшчы, сама таксама рыхтуюся да пераезду, і яшчэ шмат-шмат добрага;

— Павышэнне на пасадзе, падарожжы;

— Выжыла;

— Рамонт;

— Прадала кватэру ў РБ, з’ездзілі ў Капенгаген, сябры цудам атрымалі візы і прыязджалі да нас 2 разы, у сяброўкі не пацвердзіўся рак. Наведалі творчы вечар Чулпан Хаматавай і спектакль купалаўцаў.

— Завялі другога ката, бачылася з бацькамі;

— Бег, удзел у марафоне аматараў на Алімпіядзе, працяг добрай працы;

— Было вяселле;

— Выйшаў з глыбокай дэпрэсіі. Купіў аўто, нарэшце з’ездзіў у незабыўны адпачынак з сям’ёй. Павялічыў даход. Адкрыў для сябе паходы ў горы. Знайшоў новых сяброў і трохі паправіў здароўе. Дапамог сваяку з пераездам у Польшчу. За пару месяцаў атрымаў ДНЖ у Уроцлаве;

— Шмат падарожнічала, завяла ката;

— Знайшла хобі, падарожнічала, купіла машыну

— Паразумнела!

— Скарацілі, трэці раз выйшаў на новае месца;

— Не страціў працы і павысіў трохі заробак на ёй;

— Закрыў пытанні ў РБ, якія мяне хвалявалі;

— Жонка на шостым месяцы цяжарнасці. Рамонт практычна скончаны;

— Змог атрымаць (выбіць) некаторае павышэнне па зп, пры канцы года трапіў на праект з тэхналогіяй, якую даўно хацеў асвоіць;

— Пачала тэрапію;

— Вывучылася на капітана паруснай яхты;

— З’явіўся сабака, пачалося навучанне новай прафесіі;

— Вярнуліся дадому ў Беларусь з эміграцыі;

— Стала рэгулярна хадзіць у трэнажорную залу і наладзіла харчаванне;

— Выйшла замуж і нарэшце стала жыць з каханым не на адлегласці. Пераехала ў Літву!

— Пачаў атрымліваць прыбытак са свайго праекта;

— Апгрэйднуў свае актыўнасці, рамонт набліжаецца да завяршэння;

— Памяняў машыну, зрабіў рамонт, працягнуў развіваць свой асабісты брэнд;

— Стаў важным звяном у кампаніі, падняў зп у 2 разы;

— Выйграў «грынку»;

— Свічнуўся ў DevOps;

— Шмат вандровак, пераезд у зручную краіну, пабачыў старых сяброў.

---

Дрэннае таксама адбывалася. Кожны чацвёрты меў фінансавыя цяжкасці, кожны пяты — праблемы ў асабістым жыцці, кожны дзясяты страціў блізкага чалавека. Столькі ж хварэлі або/і страцілі працу.

У асобных адказах чытачы згадваюць смерць або хваробу блізкіх (часта анкалогію), складанасці жыцця ў эміграцыі, дэзарыентацыю, праблемы на працы. Вось некаторыя з іх:

— Праблемы ў найбліжэйшых сваякоў, якія закранаюць мяне;

— Цяжка так жыць;

— У мужа дыягнаставалі рак;

— Праблемы з індэксацыяй заробку. Адчуваецца, што грошай становіцца менш. Не магу наладзіць рэжым харчавання/актыўнасці праз стрэс. Лішняя вага;

— Выгаранне, лячыла ката;

— Памёр сабака;

— Праблемы на працы, праблемы са здароўем у сябе і блізкіх;

— Страціў новага знаёмага праз ягоную хваробу. Губляю сувязь з сябрамі, якія засталіся ў Беларусі;

— Жудасны стрэс праз працу, які прайшоў пасля звальнення;

— Палітычная сітуацыя, рост цэн, татальная нявызначанасць;

— Страціў працу, знайшоў працу, зноў страціў, зноў знайшоў, на пачатку снежня страціў;

— Рэзкае скарачэнне некалькіх калег, частка з якіх даволі даўно працавала, прымушае баяцца за сваё становішча;

— Сітуацыя ў краіне знаходжання лепшай не становіцца, і няма разумення і планаў, што рабіць і куды ехаць далей;

— Выяўленая цяжкая і рэдкая форма анкалогіі ў маленькай пляменніцы;

— Не хапала адчування бяспекі праз пастанову звольніцца, змяніць сферу дзейнасці і пры гэтым неабходнасць легалізацыі і немагчымасць вярнуцца дадому;

— Перажыў чарговую дэпрэсію;

— Скарацілі на праекце;

— Аперацыя ў сабакі; сумна было сыходзіць з мінулага месца, але я сам хацеў у геймдэў, перайшоў з фінтэху ў геймплэй;

— Асэнсаванне, што міграцыя надоўга.

---

Падзеі ў свеце таксама ўплывалі на самаадчуванне беларусаў. Больш за 70% трывожылася праз вайну ва Украіне, 62% — праз падзеі ў Беларусі, 61% — праз крызіс у ІТ і беспрацоўе. Значна менш — толькі кожнага сёмага — хвалявалі падзеі на Блізкім Усходзе і вынік прэзідэнцкіх выбараў у ЗША. А для 7% трывожных падзей у 2024 годзе наогул не было.

Тры чалавекі адказалі, што іх турбуе сітуацыя ў Грузіі. А адзін чытач падсумаваў пытанне пра сусветны парадак дня так: «Тое, што раней выклікала трывогу, ператвараецца ў нармальнасць».

Грёз уже не осталось, и это, пожалуй, к лучшему. Каким был 2024-й для беларусского ИТ?

По теме

Грёз уже не осталось, и это, пожалуй, к лучшему. Каким был 2024-й для беларусского ИТ?

«За два тыдні чосу — зарплата мідла». Праграміст 20 гадоў «працуе» Дзедам Марозам

Па тэме

«За два тыдні чосу — зарплата мідла». Праграміст 20 гадоў «працуе» Дзедам Марозам