Кітай знайшоў шчыліны ў амерыканскіх санкцыях і закупляе абсталяванне для выпуску прасунутых чыпаў

Дзяржаўная камісія па маніторынгу эканамічных пытанняў і пытанняў бяспекі ў адносінах паміж ЗША і Кітаем паказала 741-старонкавы даклад, у якім прааналізавала забарону на продаж у Кітай амерыканскага абсталявання для вытворчасці чыпаў па 14-нм або сучаснейшых тэхпрацэсах, уведзеную ў кастрычніку 2022 года адміністрацыяй Джо Байдэна.

Адзначаецца, што кітайскім імпарцёрам удаецца атрымаць абсталяванне, заявіўшы, што яно будзе задзейнічана на старэйшых вытворчых лініях, у выпадку, калі магчымасць пракантраляваць, дзе яно ў рэчаіснасці будзе задзейнічанае, абмежаваная.

Раней стала вядома, што кітайскі чыпмэйкер SMIC вырабляў прасунуты 7-нм чып для смартфона Mate 60 Pro кампаніі Huawei нягледзячы на санкцыі. Некалькі гадоў таму Huawei і SMIC былі ўнесены ў «чорны спіс» ЗША, які забараняе пастаўляць ім шэраг тэхналогій амерыканскага паходжання. З’явіліся здагадкі, што SMIC магла вырабіць гэтыя чыпы на абсталяванні, набытым да леташніх санкцый, альбо праз Японію і Нідэрланды да таго, як у гэтым ліпені і верасні адпаведна яны ўвялі абмежаванні, аналагічныя ЗША.