Кітай заваліў рынак таннымі сонечнымі панэлямі — еўрапейцы ставяць з іх платы

На Кітай прыпадае 80% сусветнай вытворчасці сонечных панэляў. Звычайна іх устанаўліваюць на дахах, але праз празмернасць тавару на рынку і таннасць жыхары Германіі і Нідэрландаў задзейнічаюць іх замест платоў — нягледзячы на тое, што на іх не падае правільна святло. А яшчэ так яны эканомяць на аплаце рабочых і рыштаванняў для ўстаноўкі панэляў на дах.

Акрамя дзвюх еўрапейскіх краін да выкарыстання сонечных панэляў у якасці платоў прыгледзеліся жыхары Вялікабрытаніі, Паўночнай Амерыкі і Аўстраліі.

Паводле падлікаў Міжнароднага энергетычнага агенцтва, цэны на спотавым рынку ў 2023 годзе ўпалі напалову, а ў 2028-м упадуць яшчэ на 40%. Панаванне Кітая на рынку сонечных панэляў, на якім цяпер склаўся лішак, не дазваляе эфектыўна канкураваць з ім іншым вендарам, напрыклад, з ЗША і Еўропы.

Еўрасаюз нават вырашыў праверыць кітайскія сонечныя панэлі на прадмет несумленнай канкурэнцыі. Там падазраюць улады Кітая ў субсідаванні мясцовага прыватнага сектара. Праблемай занепакоіліся і ў ЗША: яе ў часе свайго візіту ў азіяцкую краіну абмяркуе з мясцовымі чыноўнікамі кіраўніца амерыканскага Мінфіна Джанэт Елен.