Аддзел навін 11 чэрвеня 2024, 14:23

Кітайскія канкурэнты Tesla ўкараняюць робатаў-гуманоідаў у вытворчасць электрамабіляў

Кітайскія вытворцы электракараў зацікавіліся прымяненнем чалавекападобных робатаў — накшталт Optimus ад Tesla, піша Business Insider.

1 каментарый

Кітайскія канкурэнты Tesla ўкараняюць робатаў-гуманоідаў у вытворчасць электрамабіляў

Кітайскія вытворцы электракараў зацікавіліся прымяненнем чалавекападобных робатаў — накшталт Optimus ад Tesla, піша Business Insider.

Кампанія Dongfeng Motors запартнёрылася з мясцовай робататэхнічнай фірмай Ubtech. Яе робаты-гуманоіды Walker S павінны будуць вызваліць рабочых ад манатонных задач на зборачных лініях. Напрыклад, яны будуць правяраць рамяні бяспекі і дзвярныя замкі, ажыццяўляць кантроль якасці і займацца ўстаноўкай асобных кампанентаў.

Гэта ўжо другая кампанія ў Кітаі, якая вырашыла ўкараніць у працэс робатаў Ubtech. Яе канкурэнт Nio таксама ўжо прыняў Walker S «на стажыроўку» на вытворчасць электракараў.

UBTECH’s humanoid robot Walker S was introduced into the assembly line of NIO’s advanced vehicle manufacturing center, as an «intern» assisting in the car production. Walker S is the first humanoid robot to complete a specific workstation’s tasks on a mobile EV production line. https://t.co/iryNqgypTO
— UBTECH Robotics (@UBTECHRobotics) February 28, 2024

Робат вышынёй 1,7 метра працуе пад кіраваннем АІ кітайскай кампаніі Baidu. Ён здольны ўспрымаць навакольнае становішча ў рэальным часе і распазнаваць складаныя прадметы.

На сайце распрацоўшчыка паказана некалькі іншых робатаў-гуманоідаў — напрыклад, з галавой панды і Walker X, які выкарыстоўваецца ў футурыстычным горадзе Неом пасярод пустыні ў Саудаўскай Аравіі.

З робатамі эксперыментуюць не толькі кітайскія вендары. Кампанія Ілана Маска ўжо шмат гадоў распрацоўвае свайго такога робата Optimus. Прадпрымальнік выкладваў відэа, на якіх робат складае майку (хоць гледачы засумняваліся ў сапраўднасці гэтага роліка), шпацыруе і займаецца ёгай.

Падчас апошняй фінансавай справаздачы Маск заяўляў, што гуманоідны АІ-робат можа перавярнуць сусветную эканоміку. Да канца года Tesla плануе прыцягнуць Optimus да працы на сваіх заводах, а продаж іншым заказчыкам наладзіць да канца 2025-га.