Кнопка «хайп» і генератар ролікаў: Youtube паказаў новыя інструменты аўтараў

Аўтарам стане даступны аўтаматычны дубляж відэа, які тэсціравалі ад чэрвеня 2023 года. Сэрвіс пашырыць колькасць падтрымоўваных моў: з’явяцца іспанская, італьянская, партугальская, французская і іншыя.

У Youtube Studio з’явіцца ўкладка Inspiration. Новы інструмент дапаможа аўтарам прыдумаць ідэі для відэа, загалоўкі і мініяцюры ролікаў. Youtube пазіцыянуе гэты інструмент як функцыю мазгавога штурму, але сэрвіс можа быць карысны і пры стварэнні паўнавартасных праектаў.

Таксама з’явіцца функцыя генерацыі відэа пры дапамозе мадэлі Veo. Карыстальнікі змогуць ствараць аніміраваныя выявы або кароткія ролікі, не даўжэйшыя за 6 секунд. Кантэнт будзе пазначаны вадзяным знакам, што яго згенераваў АІ.

Акрамя лайкаў з’явіцца кнопка «хайп», якая павышае верагоднасць з’яўлення роліка ў раздзеле папулярнага за тыдзень. Яе можна выкарыстоўваць толькі ў роліках, апублікаваных за апошнія сем дзён, у аўтара мае быць менш за 500 тысяч падпісчыкаў.

Аўтары змогуць ствараць суполкі, у якіх фанаты будуць мець магчымасць пагутарыць са стваральнікамі кантэнту і іншымі карыстальнікамі. Адказы карыстальнікам можна будзе генераваць з дапамогай АІ.