Аддзел навін world 28 мая 2025, 10:59

Камп’ютарная інжынерыя і інфарматыка ўвайшлі ў топ дысцыплін з найвышэйшым узроўнем беспрацоўя ў ЗША

Станавіцца нутрыцыёлагам, знаўцам гісторыі мастацтваў або філосафам з пункту гледжання далейшага пошуку працы цяпер мае больш сэнсу, чым ісці ў STEM-дысцыпліны. Пра гэта піша CNBC са спасылкай на аналіз рынку працы для выпускнікоў ВНУ розных спецыяльнасцяў ад Федэральнага рэзервовага банка Нью-Ёрка.

Пакінуць каментарый

Камп’ютарная інжынерыя і інфарматыка ўвайшлі ў топ дысцыплін з найвышэйшым узроўнем беспрацоўя ў ЗША

Станавіцца нутрыцыёлагам, знаўцам гісторыі мастацтваў або філосафам з пункту гледжання далейшага пошуку працы цяпер мае больш сэнсу, чым ісці ў STEM-дысцыпліны. Пра гэта піша CNBC са спасылкай на аналіз рынку працы для выпускнікоў ВНУ розных спецыяльнасцяў ад Федэральнага рэзервовага банка Нью-Ёрка.

Так, беспрацоўе сярод выпускнікоў, чыя спецыялізацыя была камп’ютарная інжынерыя і інфарматыка, складае 7,5% і 6,1% адпаведна — гэта значна вышэй за сярэдні паказчык па краіне. Таксама высокі працэнт тых, хто не можа знайсці працу, у сферы інфармацыйных сістэм і кіравання імі — 5,6%.

Для параўнання: у гісторыі мастацтваў узровень беспрацоўя склаў 3%, а сярод спецыялістаў у галіне правільнага харчавання — усяго 0,4%. Эканоміка (4,9%) і фінансы (3,7%) у плане кар’ерных перспектыў паказалі сябе горш за тэалогію (3,1%) і філасофію (3,2%).

CNBC адзначае, што зумерам усё цяжэй уступаць і знаходзіцца на рынку працы. Так, колькасць дамашніх гаспадарак з прадстаўнікамі гэтага пакалення, якія атрымліваюць дапамогу па беспрацоўі, у лютым вырасла прыкладна на 32% у параўнанні з аналагічным перыядам летась, а ўзровень беспрацоўя сярод нядаўніх выпускнікоў у сакавіку вырас да 5,8% — год таму было 4,6%. Гэтыя даныя таксама падае Федрэзерв.

STEM-дысцыпліны прынята лічыць пуцёўкай да высокааплатнай працы — і гэта дагэтуль так. Менавіта ў выпускнікоў па камп’ютарнай інжынерыі і інфарматыцы фіксуюцца найвышэйшыя заробкі: медыяна складае $80 тысяч у год.

Тым не менш усё больш запатрабаванымі становяцца гуманітарныя спецыяльнасці — напрыклад, гісторыя і філалогія. І звязана гэта, як ні дзіўна, з бумам ШІ, які прыводзіць да росту попыту на людзей з творчым мысленнем і софт-скіламі.