Латвія канчаткова забараніла беларусам працаваць у крытычнай інфраструктуры. Але зробіць выключэнні па нерухомасці ў краіне

Законапраект пазбаўляе беларусаў і расіян магчымасці працаваць і аказваць паслугі на аб’ектах крытычнай інфраструктуры або крытычнай інфраструктуры еўрапейскага ўзроўню, калі гэта прадугледжвае доступ да інфармацыі ці абсталявання, неабходнага для функцыянавання такой інфраструктуры. Працу можна будзе выконваць толькі пры наяўнасці асобнага дазволу ад органаў бяспекі. Таксама грамадзяне дзвюх краін і заснаваныя ў іх юрасобы не змогуць быць уласнікамі, уладальнікамі ці бенефіцыярамі аб’ектаў такой інфраструктуры.

Акрамя гэтага, у канчатковым чытанні прыняты законапраект, які забараняе шэрагу катэгорый работнікаў, напрыклад у дзяржорганах і асобам з доступам да дзяржсакрэтаў, наведваць Беларусь і Расію.

Таксама ў чацвер Сейм у трэцім чытанні ўхваліў законапраект, які прадугледжвае абмежаванні на куплю нерухомасці беларусамі і расіянамі. У ім з’явіліся папраўкі, паводле якіх яны змогуць купіць кватэру ў Латвіі, калі яна будзе «адзіным нерухомым маёнткам, прызначаным для пражывання». Але ў пакупнікоў павінен быць статус пастаяннага жыхара ЕС або сапраўдны дазвол на пастаяннае пражыванне ў Латвіі на момант уступлення закона ў сілу. Цяпер законапраект павінен прайсці канчатковае чытанне.