Расія «дасягнула лічбавага суверэнітэту»… Бо ўсе замежныя ІТ-кампаніі сышлі

«Калі казаць пра лічбавы суверэнітэт, то мы яго ўжо дасягнулі, бо замежныя кампаніі ўжо сышлі з айчыннага рынку», — сказаў Шадаеў.

«Мы цяпер аддадзеныя самі сабе», — адзначыў міністр. Ён дадаў, што цяпер расійская тэхналагічная галіна мае ўсё неабходнае, каб развівацца.

На думку Шадаева, маштаб ад’езду ІТ-спецыялістаў не такі глабальны і непапраўнай шкоды галіне не нанёс. Ён кажа, што тэхналагічныя кампаніі ў Расіі развіваюцца, заробкі падымаюць, супрацоўнікам ствараюць неабходныя ўмовы, матывуюць іх заставацца.

Пры гэтым Шадаеў прызнаў, што з краіны з’ехала значная частка распрацоўшчыкаў — «адныя з самы кампетэнтных, прафесійных супрацоўнікаў, якія дакладна запатрабаваныя на міжнародным рынку».

Паводле яго слоў, Мінлічбы спадзяецца да канца года вырашыць пытанне з рэгуляваннем выкарыстання ў Расіі замежнага праграмнага забеспячэння: толькі 20% катэгорый софту, які выкарыстоўваецца ў эканоміцы, на прамысловых прадпрыемствах, маюць «адэкватныя даспелыя расійскія аналагі».

У кастрычніку Максут Шадаеў казаў пра неабходнасць «зняць асцярогі і страхі тых, хто з’ехаў». У верасні Forbes пісаў, што каля 6% ІТ-спецыялістаў ужо пакінулі Расію ў 2022 годзе, 25% плануюць рэлакавацца на працягу найбліжэйшага года. У сакавіку паведамлялася пра ад’езд да 70 тысяч айцішнікаў з Расіі.