Пакуль лідары амерыканскай ШІ-сферы заклікаюць запаволіцца і ўвесці рэгуляванне перадавых мадэляў, лідары дзяржаваў — прэзідэнт ЗША Дональд Трамп і старшыня Кітая Сі Цзінь Пін — робяць стаўку на далейшае развіццё тэхналогіі.
Пакуль лідары амерыканскай ШІ-сферы заклікаюць запаволіцца і ўвесці рэгуляванне перадавых мадэляў, лідары дзяржаваў — прэзідэнт ЗША Дональд Трамп і старшыня Кітая Сі Цзінь Пін — робяць стаўку на далейшае развіццё тэхналогіі.
Трамп адмахнуўся ад папярэджанняў супрацоўнікаў ШІ-кампаній пра магчымую пагрозу чалавецтву ў Ірландыі, куды ён прыехаў паглядзець Irish Open.
«Мы апераджаем Кітай у ШІ. Мы самая тэхналагічна развітая краіна ў свеце, і, шчыра кажучы, я хачу, каб так і заставалася, таму што хто перамагае ў ШІ, той перамагае», — заявіў Трамп.
«Мы можам увесці абмежаванні, можам зрабіць тое і іншае, але я думаю, што ёсць вельмі негатыўныя сілы, якія падымаюць гэтую тэму, хоць не павінны, і кажуць пра рэчы, якія не адбудуцца», — дапоўніў ён сваю экспертную думку.
Сі пакуль напрамую не каментаваў папярэджанні пра магчымы апакаліпсіс праз ШІ. Замест гэтага на саміце BRICS у Нью-Дэлі ў нядзелю ён заклікаў краіны Глабальнага Поўдня — дзяржаваў Азіі, Афрыкі і Паўднёвай Амерыкі — хутчэй выпрацаваць агульнасусветныя стандарты рэгулявання ШІ.
«Мы павінны ставіць чалавека ў цэнтр, развіваць ШІ на карысць людзей і паскорыць выпрацоўку глабальных правілаў яго рэгулявання на аснове кансенсусу. Тады новыя тэхналогіі змогуць працаваць на ўсеагульны дабрабыт», — заявіў Сі.
Сі таксама адзначыў, што Кітай узначаліць стварэнне адкрытай ШІ-супольнасці для краінаў BRICS: там будуць разам трэніраваць вялікія моўныя мадэлі, праводзіць навучальныя семінары і будаваць агульную экасістэму без закрытых прапрыетарных бар’ераў.
Трамп і Сі павінны сустрэцца ў Белым доме 24 верасня. На гэтым фоне заклікі кіраўнікоў вядучых ШІ-кампаній дамовіцца прыцягваюць усё больш увагі.
Кіраўнік OpenAI Сэм Альтман у нядзельным інтэрв’ю Fortune заявіў, што Трамп і Сі заслужылі б Нобелеўскую прэмію міру, калі б здолелі дамовіцца пра агульныя правілы бяспечнага развіцця ШІ.
«Нават калі толькі ЗША і Кітай здолеюць дамовіцца пра агульныя стандарты і тэставанне пры распрацоўцы гэтай тэхналогіі, гэта было б выдатным дасягненнем», — сказаў Альтман.
Ён не ўдакладніў, як менавіта павінны выглядаць такія стандарты, але заявіў, што стварыць іх было б нескладана, а дакумент мог бы заняць «адну старонку». Кіраўнік Anthropic Дарыё Амадэі ў інтэрв’ю CBS, якое выйшла ў нядзелю, таксама заклікаў ЗША весці перамовы з Кітаем і разам «вызначыць абмежаванне на хуткасць развіцця гэтай тэхналогіі».
Кітайская дзяржаўная газета Global Times раскрытыкавала заклік Амадэі запаволіць развіццё ШІ. У рэдакцыйным артыкуле выданне заявіла, што ягоная прапанова выглядае як разумная спроба знізіць рызыкі, але на справе нагадвае сцэнар «халоднай вайны», накіраванай супраць Кітая. На думку газеты, сапраўдная мэта ініцыятывы — паспрабаваць абмежаваць развіццё ШІ ў Кітаі з дапамогай тэхналагічных бар’ераў, захаваць гегемонію Вашынгтона ў перадавых тэхналогіях і выключыць Кітай з глабальнай сістэмы кіравання ШІ.
«Гэтая "ціхая халодная вайна ў ШІ" крывадушная і недальнабачная», — заявіла Global Times. На думку выдання, выцясненне Кітая значна павялічыць выдаткі эксперыментаў і рызыку страціць кантроль над развіццём ШІ ва ўсім свеце.
Тым часам дыскусія пра тое, ці здольны ШІ прывесці да катастрофы, стала асабліва вострай. На мінулым тыдні даследчык Anthropic Джэйкаб Коксан пакінуў кампанію, заявіўшы, што OpenAI і Anthropic дзейнічаюць безадказна і «гуляюць нашымі жыццямі». Паводле яго, людзі, якія ствараюць гэтую тэхналогію, «шчыра лічаць, што да канца дзесяцігоддзя яна можа забіць нас усіх». Пасля гэтага яшчэ некалькі супрацоўнікаў OpenAI і Anthropic публічна выказаліся пра пагрозу для чалавецтва, калі распрацоўку ШІ не абмежаваць.
МЗС Кітая заклікаў усе бакі «прасоўваць адкрыты, інклюзіўны і добразычлівы падыход да ШІ». Там заявілі, што раздзьмуванне пагрозаў, канфрантацыя і нядобрасумленная канкурэнцыя толькі парушаць глабальнае кіраванне ШІ і нікому не пойдуць на карысць. ЗША і Кітай плануюць абмеркаваць рызыкі, звязаныя з перадавымі ШІ-мадэлямі, у сярэдзіне верасня.
Рэлацыраваліся? Цяпер вы можаце каментаваць без верыфікацыі акаўнта.