«Ваўкоў баяцца — у лес не хадзіць»: Лукашэнка назваў крыпту лекамі ад даляравай залежнасці

Гаворка ішла пра меры па павелічэнні электраспажывання ў краіне і далейшаму развіццю электраэнергетыкі. Для прыкладу палітык прывёў майнінг крыптавалют, электратранспарт, будаўніцтва жылля з электраацяпленнем — усё гэта павінна дапамагчы загрузіць дзеючыя і новыя магутнасці.

«Я тут усялякія запіскі прачытаў і меркаванні. У адной з запісак пішуць, што майнінг крыптавалют можа быць нестабільным. Недзе вышэй, недзе ніжэй. У нас зараз увесь свет хварэе глабальнай праблемай — адысці ад залежнасці ад адной валюты — даляра. І гэты працэс будзе нарастаць. І крыптавалюта з’яўляецца, напэўна, адным з варыянтаў сыходу», — цытуе яго БелТА.

«Дык чаму ж мы ўжо так перажываем? Валатыльнасць нейкая… Ну, напэўна, будзе. Але ваўкоў баяцца — у лес не хадзіць», — дадаў Лукашэнка.

Дарэчы, біткоін сёння раніцай упаў да $96 тысяч — мінімум за 5 месяцаў.

Таксама Лукашэнка запатрабаваў замяніць маршруткі аўтобусамі, каб вырашыць пытанне чэргаў. У прыватнасці, электрычнымі.

«Людзі крыўдзяцца: стаяць, асабліва ў гадзіны пік, па 150 метраў, як яны пішуць, у чэргах, каб уціснуцца ў гэтую маршрутку смярдзючую. Паслухайце, чаго вы над людзьмі здзекуецеся?!» — указаў ён на скаргі ў сацсетках. І падкрэсліў, што на гэтым можна зарабляць.

Па яго словах, пілотныя праекты па перакладзе грамадскага транспарту на электрычны ўкаранёны ў Шклове, Жодзіне і Наваполацку. А ўвогуле ў Беларусі эксплуатуецца больш за 44 тысячы электрамабіляў і звыш 1870 зарадных станцый.